Home Politica Sugerencia di Gobernador pa coopera cu diferente instituto ta hopi al caso

Sugerencia di Gobernador pa coopera cu diferente instituto ta hopi al caso

0
0
SHARE
- Advertisement -

Segun Booshi Wever:

ORANJESTAD (AAN): Segun Booshi Wever di Partido UPP, e “sugerencia” di sr. Gobernador pa busca cooperacion den y entre e diferente instituto ta hopi al caso, mirando e metemento y dominio di minister(nan) den un of mas departamento.

   Casonan cu ya den pasado mi a yega di denuncia, ta e departamento di Impuesto unda riba instruccion di minister, belasting tabata worde ge-“fixed”; DIMAS unda minister ta(bata) mete den asunto di otorgamento di permiso; labor unda despues cu a bin instruccion pa stop dunamento di un prome permiso pa trabao, ta duna un cantidad di excepcion.

   E observacion cu e gobierno mester funciona dentro di e normanan di un Rechtstaat (Estado di Derecho) ta confirma cu na Pais Aruba democracia NO ta funciona adecuadamente.

   Pa 4 aña largo gobierno cu cifranan ficticio a pretende cu situacion na Aruba ta excelente. 

   Pa 4 aña largo e institutonan, cu Banco Central na cabez,  cu mester a coregi esaki, a keda keto, y awor numa despues di eleccion ta informa Sr. Gobernador di e situacion y e cifranan real.

   Manera por ta conoci, U.P.P. den su programa a planea e instituto di “Ombudsman”, cu lo mester a yuda e transparencia den gobierno. Ta un placer pa weita cu sr. Gobernador a sugeri gobierno pa institucionalisa esaki den nos Constitucion, locual lo duna bida y significacion tambe na e asina yama “klokkeluiders” cu mester denuncia cualkier asunto inacceptabel den gobierno; aki nos por corda e caso di e dos dokternan na IMSAN kende a denuncia cierto asunto inacceptable, a worde retira, locual sinembargo a costa caha di gobierno alrededor di mei miyon Florin!

  Sr. Gobernador a pone hopi enfasis riba e asunto di screening di e candidatonan pa Minister. E partido AVP, y especificamente un of mas di su candidatonan, a corre campaña cu miras riba e puesto aki. Pueblo a ser adverti, y awor mester ta alerto pa cualkier eventualidad.

Pues no por descarta e probabilidad cu, fuera di a usa fondonan publico, e campaña di AVP a ser financia cu placa di baho mundo, locual a contribui cu AVP a gana e eleccion.

Si e screening tuma lugar manera esaki a sosede na Curaçao, mi ta convenci cu algun candidato lo tin basta dificultad pa bira minister, sigur tambe pa motibo di cierto lazonan familiar.

  Por ultimo, mi a comprende cu gobierno lo tin intencion pa ancra den nos Constitucion cu e deficit di Pais Aruba no mag sobrepasa 3% di nos GDP.

Por corda cu na dos ocasion (maart 2012 y juni 2013) mi a presenta un mocion pa esaki, pero unda ambos biaha tanto AVP+ como MEP a vota CONTRA!

Aki e dicho “mihor laat cu nunca” ta aplicabel; lo ta recomendabel si pa ancra tambe cu nos “schuldquota” no mag sobrepasa 40% (maximal 45%) di nos GDP. E ora ey nos finanzas publico lo ta mihor protehi.

  U.P.P., aunke pafor di Parlamento, lo keda na vanguardia di e comunidad di Aruba, y lo vigila pa gobierno NO sigui trapa e principionan di bon gobernacion.

Cu e carta di sr. Gobernador y su instruccionnan bastante cla na formador Mike Eman, na bista, U.P.P. ta convenci di por conta cu su sosten.

- Advertisement -

DUNA COMENTARIO

Please enter your comment!
Please enter your name here