Home Hudicial Alex Mathew a haya 4 aña y mey di castigo pa trafico...

Alex Mathew a haya 4 aña y mey di castigo pa trafico di hende

3
0
SHARE
- Advertisement -

*Mathew deteni mesora den corte

ORANJESTAD    (AAN): Sospechoso Alex Mathew a presenta dilanti di huez na corte di husticia Diabierna, pa tende veredicto den un caso contra dje y su pareha Liliana De Andrade.

Ambos a wordo acusa di trafico humano, unda cu nan lo a uza menaza y otro metodonan, pa percura di obliga e mucha muhernan di keda balia striptease den Foxy Lady.

Huez a cuminza na trece motibonan dilanti, dicon cierto parti di defensa den e caso aki a wordo rechaza.

Mathew a defende su mes durante tratamento di e caso algun siman pasa, prome cu e caso a wordo posponi 1 dia.

E caso a continua sin cu Mathew tabata presente, door cu el a haya un accidente.

El a manda un carta di docter pa corte pa indica cu e no por tabata presente, pero e caso a wordo trata.

Sinembargo e dia cu si e tabata presente, Mathew a bisa huez cu e kier pa e citacion contra dje wordo declara nulo, pasobra e investigacion no tabata cera ainda.

Huez a haya cu esey no tabata suficiente motibo.

Un otro motibo pa declara e citacion nulo segun Mathew tabata door cu huez a rechaza su peticion di scucha cierto testigonan, pero huez a rechaza esaki tambe bisando cu varios testigo atravez di e añanan cu a pasa a wordo scucha caba y cu Mathew no a duna un motibo valido pakico nan mester wordo scucha atrobe.

Mathew a duna como otro motibo pakico e caso contra dje mester wordo declara nulo, cu e no a wordo permiti di busca un abogado nobo.

Huez a rechaza esaki tambe bisando cu for di varios luna pasa ora cu Mathew y su abogado a bay for di otro, e tabata tin hopi tempo pa busca uno.

Su argumento cu e no por a haya un abogado door cu e no tabata tin tur su documentonan, huez no a haya valido.

Huez a splica tambe cu apesar cu Mathew a manda un carta di docter pa corte, tabata hopi importante pa sigui cu e caso cu of sin Mathew, mirando e cantidad di tempo cu a pasa caba.

Huez despues a indica cu tur e acusacionnan contra Mathew a wordo comproba.

Segun huez, apesar cu e mucha muhernan a firma un contrato boluntario pa balia striptease cu ta algo legal, ma dado momento Mathew y a probecha di nan, door di no paga nan locual el a priminti y stroba nan di bay ora cu nan kier a bay for di e lugar.

Segun huez, Mathew den cierto caso a saca potret sexual di algun di e mucha muhernan y a menaza cu e lo pone esakinan riba internet si nan no hasi locual e tabata kier pa nan hasi.

E no tabata permiti e muhernan bay unda cu nan tabata kier den nan tempo liber y e tabata tene paspoort di algun di nan.

Huez a menciona un ehempel di un di e mucha muhernan cu a scapa, unda cu despues Mathew a haye trece bek y maltrate.

Huez a menciona otro ehempelnan unda esey lo a sosode, unda cu lo a dal un di e mucha muhernan na su ribchi.

Tabata tin un persona tambe cu a bisa cu Mathew lo a menaze cu un zaag electrico, mientras cu e lo a dal un persona cu rudia den su cara, unda cu e persona aki a bay for di tino.

Segun huez, na un manera structura Mathew a probecha di e mucha muhernan y a comete trafico humando.

Fiscal a exigi un castigo incondicional di 5 aña contra e acusado y huez a splica cu door cu hopi tempo a pasa prome cu e caso por a wordo trata, e ta baha esaki cu 6 luna.

Pues el a condena Mathew na un castigo incondicional di 4 aña y mey kitando e tempo cu anteriormente el a sinta caba den prison y un multa di 15.000 florin.

Liliana de Andrade no tabata presente door cu e tabata na Merca, pero huez a dune un castigo incondicional di 22 luna.

Huez a indica na Mathew cu e tin 14 dia pa apela y el a bisa mesora cu e lo apela.

El a wordo deteni mesora den corte mes.

- Advertisement -

DUNA COMENTARIO

Please enter your comment!
Please enter your name here