Home General “Cambio den sistema di AOV no ta un medida”

“Cambio den sistema di AOV no ta un medida”

0
0
SHARE
- Advertisement -

Herbert Diaz, ex waarnemend directeur SVb,

ORANJESTAD   (AAN):   “No por bisa cu un Gobierno a haci un mal trabou. Un Gobierno por hustifica su decisionnan, esta cu e kier pa e pueblo tin e beneficionan ey,” Herbert Diaz, ex ehecutivo di SVb a bisa den un declaracion relaciona cu e decision tuma pa aumenta e suma cu pensionadonan ta haya. Pero ta agrega cu den transcurso di añanan, e sistema aki mester wordo restructura.

   VE pensioen di AOV cu a wordo introduci na 1960 sigur no a conta cu e echo cu na dado momento famianan ta bira mas chikito, cu menos hende ta drenta e proceso laboral mientras cu tin mas hende ta bira mas bieu.

Ta situacionnan cu a surgi na diferente pais di mundo y gobiernonan mester tuma e pasonan necesario pa haci e cambionan necesario -no medida – pa garantisa existencia di e fondo.

 Na Aruba Gabinete Mike Eman II ta haci’e den e plataforma Dialogo Social, unda cu ta busca pa yega na un consesus pa logra e miho formula pa Aruba. Un reforma di AOV pa hibe den su parameter den cual el a wordo crea no por encera baha e suma di pensioen na e momentonan aki ya cu no ta moralmente, socialmente y ni politicamente hustificabel mas, segun Diaz a bisa. 

    No tin formula magico, e ta di acuerdo cune, pasobra por ehempel na Hulanda tin un edad di pensioen di 67 aña, e prima ta 18% y Gobierno ta subsidia e fondo cu 4% pa aña, minimo. Esey ta e parameter di Hulanda, cu ta hopi mas pisa cu esun di Aruba. “Den maneho di AOV no tin nada magico, cada pais tin su mesun condicionnan y pa paga cada pais mester yega na un formula aceptabel y cu por wordo carga.”

     Diaz ta haya si, esey ta e impresion cu e tin, cu e hendenan na Aruba ta bira mucho emocional ora di papia di cambio den e sistema di pensioen, pasobra nan no ta compronde con e ta funciona, y ta lig’e cu otro aspectonan.

Ta trata di temanan cu mester wordo trata den un forma directo pa yega na decisionnan racional y efectivo, ya cu ta mesun problema cu hopi pais na mundo ta confronta. Aruba no ta diferente. “E ta un hecho cu mester haci algo, sino mañan e situacion ta bay ta hopi grave. Ki lo pasa si yega e dia cu SVb no tin e placa mas paga tur e pensionadonan y Gobierno no tin placa pa subsidia? SVb no tin magonan den servicio y simplemente nan lo no por paga.  Of nan lo mester tuma e decision, cu ta hopi mas serio, pa corta e pensioennan. Pesey mi ta recomenda tur hende, uza nan cabes y mira e situacion cu sano huicio y duna espacio pa bini cu e reformanan cu mester bin.” 

    Na final Herbert Diaz a enfatisa cu kier e aclarea algo riba e tema aki. Hopi hende, el a bisa, kier bin papia di medida. Pero, e ta splica, den e caso di AOV no ta trata di medida, ta trata di un reforma pa e fondo por sigui funciona. “E no mester wordo interpreta como un medida.”

- Advertisement -

DUNA COMENTARIO

Please enter your comment!
Please enter your name here