ORANJESTAD (AAN): E agrupacion “Paranda di Aguinaldo” a presenta nan Disco Compacto nobo cu ta contene tur e temanan cu nan a participa cu nan den e “Prome Festival di Musica y Paranda di Aguinaldo 2013” organiza pa sta. Marelene van der Linde cu sosten di UNOCA, pa asina aki, rebiba e bunita tradicion di nos antepasado cu sigur nos lo mester sigui keda sostene, carga y nunca lubida!
E CD aki ta contene e “Reina di Aguinaldo di Porta 2013 Hubenil” y Tambe 1er luga di propio Composicion “Dilanti di Bo Porta” sta. Franksjen Vos, como tambe e 3er Lugar “Aguinaldo di Porta 2013 Hubenil” sta. Milanchely Richardson y tambe cu e Propio Composicion “Un dushi Aguinaldo” cu composicionnan di letra y melodia di señor Jhon Freddy T. Montoya.
Nos ta felicita sta. Franksjen Vos y sta. Milanchely Richardson pa nan bunita interprecion den e cancionan riba e cd, sin lubida señor Roland Jansen kende a sa di haci tur cos posibel pa forma e agrupacion aki, na e hoben Shamouk Greaux p’e areglo di e cancionnan huntu cu señor Mario Kelly Jr pa su areglo riba e melodia riba e violinnan cu a keda magistral, na señor Franklin Helder p’e di dos violin den e grabacion, señor Wiwi Maduro, señor Richi Alberto, sta Janaika Henriquez kende nunca a laga nos na caya y sacrifica su oranan largo pa nos logra caba cu e produccion, na Charise Arends pa tur e consehonan fructifero, na señor Dimitri Frans pa un otro excelente grabacion y produccion, sin lubida e mayornan di e dos hoben aki y henter e famia di e agrupacion completo pa nan pasenshi y contribucion.
