Home Editorial Editorial: Cu speranza pa futuro!

Editorial: Cu speranza pa futuro!

0
0
SHARE
- Advertisement -

            Awor cu aña ta yegando su fin, ta tempo atrobe pa reflexiona y saca conclusionnan cu por sirbi di sustento pa e temporada cu ta dilanti di porta. No tin nada mas malo cu ta para riba e umbral di un aña nobo cu bo curpa yen di desaliento, di desesperanza, di un falta di animo o di creencia den loke di positivo e por tin pa bo, y pa bo isla.

            Aunke cosnan no ta pinta mucho bon pa motibo di e gastonan excesivo cu a pone nos isla den un percance financiero serio, nada ta bisa nos cu no tin remedi pe. Si pa tur otro cos, sin excepcion, por logra solucionnan practico, mi no ta mira pakico nos no por cifra nos confianza den Gobierno y kere cu e ta bay na encuentro di e mal tempo cu cara na laira y algun solucion bao di e manganan di su camisa. E no ta un mago, y masha poco di nos ta kere den magia como un posible solucion, pero si e ta componi di un ekipo di hende cu no ta ria pa mal tempo. Mi tin e confianza cu nan lo sa di enfrenta e problemanan valiendo nan mes di solucionnan cu di antemano nan lo a studia detenidamente y den cual nan ta kere, y cu por resulta beneficioso pa nos isla.

            Awor, semper tin esnan entre nos cu ta mas interesa den partido cu den patria, y no ta spar palabra pa caba cu un of otro ministro, hasta cu cosnan mega ridiculo. Tin tambe otronan cu ta biba cu e temor di perde cualke patrimonio cu nan por tin, y fuera di esey, ta biba cu e ausencia absoluto di un balor civil cu por permiti nan e creencia o speranza di un recuperacion di loke sea nan ta sinti cu nan lo por perde. Ta e temor ey ta trece e desaliento definitivo, no esun cu no ta kere den ningun clase di solucion.

            Ami ta convenci cu ta bay tin solucion pa nos problemanan financiero, y cu e Gobierno actual ta esun cu ta den e posicion ideal di haci loke ta necesario pa e solucionnan bira realidad. E paseo na Europa no a laga di tin su banda positivo, y e lazonan cu Hulanda cu a bira mas fuerte cu nunca, por ta e prinicipio di e caminda cu ta conduci na e solucionnan cu nos tin mester. No cu mi ta partidario di entrega mas di nos autonomia na Madre Patria, sino cu mi ta kere cu como parti integral di Reino Hulandes, nos merece e apoyo di kende a duna nos tanto cos positivo durante e ultimo siglonan.

            Ya nos a yega caba na e extremo di loke nos por o ta dispuesto di entrega na Hulanda; e pasaporte tabata suficiente, pero awor a bin acerca cu nos rijbewijsnan tambe mester bin di Hulanda? Pakico? Nan conoce e trafico di Aruba miho cu nos expertonan di e ramo? Mi no ta kere cu tin hopi hende cu ta mira cu bon wowo e entrega di mas asunto cu ta forma parti di nos autonomia na Hulanda.

            Loke si nos tin mester di Hulanda ta algun Huez cu ta dispuesto di respeta nos idiosincracia, o ta dispuesto di por menos studie pa prome cu dicta sentencia claridad drenta nan cerebronan, y nan respeta nos manera di pensa y nos forma di biba. Lo ultimo, o sea e sentencianan ridiculo cu algun a dicta encuanto abuso di menornan, ta suficiente pa pone nan den e proximo KLM pa Schiphol. Ningun hende ta contento cu nan, y ta sigui perde confianza den nan constantemente. Di kico nan ta sirbi nos anto?

             

- Advertisement -

DUNA COMENTARIO

Please enter your comment!
Please enter your name here