Ata nos atrobe cu un caso cu a babuca mayoria di nos, no pasobra nos no ta compronde e Ley ridiculo cu ta goberna e asunto, sino pasobra na lugar di recompensa e victima, e ta premia e maleante. E chinesnan ta conoci na Aruba pa ta hendenan pacifico, cu den nan mayoria ta prefera di perde cu bay den un bululu publico. Nan ta traha duro y nan ta sacrifica nan tempo invirtiendo e den labornan cu a la larga ta contribui na algo cu nan ta soña di obtene cu nan trabaonan. O sea cu nan ta un grupo di ciudadanonan cu ta contribui na e paz di nos isla.
Awor dos di nan a haya nan mes den problema pasobra nan a gara y bati un ladron cu a drenta pa bay cu nan propiedadnan, y haci Dios sa kico otro cu nan famianan. “Masha bon”, mayoria absoluto di nos a grita, keriendo cu Ley tey pa protege e ciudadanonan cu ta mantene nan mes fuera di problema y hasta ta contribui pa pone den man di husticia elementonan vandalico cu di ningun otro manera ni e Ministro di Husticia ni e set de Hueznan mahunche cu a bin di Hulanda, ni e Fiscalnan cu aparentemente nan no kier na Hulanda y ta dump nan riba nos, ta dispuesto di haci. Si tabata tin otro Ministro di Husticia, nos lo a pone presion pa e revoca cierto Leynan, manda nan Staten pa revision, y duna nos otronan cu ta pas cu nos idiosincracia y custumbranan. En general, Leynan di Hulanda por ta bon pa Hulanda, pero den hopi caso no ta funciona na Aruba.
Si nos tabata tin un Ministro di Husticia cu ta compronde e relacion Ley-Ciudadano mihor, e lo a haci un clean-up no solamente den e Leynan, sino den e Hueznan y Fiscalnan tambe. Pero, ata nos pega cu e candidato di Dakota, apoya pa un Prome Ministro cu a perde hopi di su prestigio den mi bista. Simplemente mi no ta kere mas den dje. E por wel di sigui shake hand cu e personahenan di Hulanda, y otronan di Europa, pero na Aruba e ta perdiendo tereno tur dia pasobra e no ta atendiendo loke e mester atende cu urgencia.
Awor ta bin e pregunta: con Ley ta spera pa nos defende nos mes frente un intruso? Y si e ta arma? of e ta bin acompaña? Grita “boo” cu e speranza cu e ta core bay? Esey un Fiscal anterior a sugeri pa nos haci, tempo cu e tabata activo na Aruba. Mi a puntre si ta loco e ta, of e tin un historial di casonan unda e “boo” a funciona. Claro cu e no por a produci ni un solo caso, corda un historial di nan.
Nos hogarnan ta nos castiyonan personal. Ningun hende tin e derecho di traspasa nos curanan pa penetra den un teritorio prohibi pa nan drenta, y peligroso pa nan bidanan. Ta e deber di Gobierno di revisa e Leynan cu ta perhudica nos accionnan di defensa di nos famianan y propiedadnan, y duna nos hermentnan mas solido y efectivo contra cualke intruso cu kier risca su bida traspasando teritorionan estrictamente prohibi.
Mi ta di opinion cu mester pone e dos Chinesnan inmediatamente den libertad y pidi nan despensa pa e tempo cu nan a pasa deteni inhustamente. No tin Ley na mundo cu por viola e derecho sagrado di cualke ciudadano, di cua pais cu ta, di por dispone di armanan y e defensa pa protege y garantiza e seguridad di su famia y su propiedadnan. Pensa den algo contrario ta parcemi propio di hendenan cu no ta consciente con peligroso Aruba a bira, y cuanto cos inespera por sosode.
