Home General Hyatt Place ta bira operador di hotel ehecutivo den Caya Grandi

Hyatt Place ta bira operador di hotel ehecutivo den Caya Grandi

4
0
SHARE
- Advertisement -

“Un hotel cu lo contribui grandemente na desaroyo di Caya Grandi”

ORANJESTAD    (AAN): Den luna di april ultimo representante di e cadena hotelero prestigioso Hyatt a bishita Aruba pa evalua posibel operacion di un hotel den Caya Grandi. Siman pasa a keda confirma na Gabinete Mike Eman II cu Hyatt, ta bira e operador di e hotel ehecutivo den Caya G.F. Betico Croes. E hotel aki ta bay cay bou di e un di e marcanan mas exitoso di  e corporacion, esta ‘Hyatt Place’.

    Prome Minister Mike Eman a haci e anuncio aki diahuebs ultimo durante un conferencia di prensa caminda a menciona e hotel aki como un di e proyectonan cu ta biniendo den centro di ciudad pa eleva su nivel como atraccion turistico y comercial. “Un hotel cu lo contribui grandemente na e desaroyo y cantidad di persona cu ta cana den caya. Un hotel bon ocupa ta garantisa caba un cantidad di hende cu lo ta activo comercial y den parti di entretenimento,” Premier Eman a bisa.


    E marca ‘Hyatt Place’ ta un concepto caminda e gigante di hoteleria ta combina estilo, innovacion y convenciencia 24 ora pa 7 dia pa siman pa crea un estadia perfectamente consistente cu cada comodidad moderno cu e cliente merece. E cadena ta merecedo di varios premio y reconocemento, incluyendo e “Highest in Guest Satisfaction Among Upscale Hotel Chains” segun J.D. Power e aña aki. Adicionalmente Hyatt Place ta figura como #1 Select-Service Brand dor di Business Travel News 2013 Hotel Chain Survey pa e di dos aña consecutivo.

    Na april ultimo e representantenan di Hyatt a evalua e tereno cu e inversionistanan a propone y  tambe a determina cu e diseñonan ta na nan satisfaccion. Nan a bay cu e informacion aki bek na nan oficina principal corporativo pa tuma un decision. Nan a gusta e plan aki asina hopi cu hunto cu e renobacion di henter Caya Grandi y centro di Oranjestad ta priminti un potencial enorme pa laga Oranjestad bira un localidad excelente pa un hotel ehecutivo.

    Mientras tanto, durante ultimo e lunanan despues di e bishita di parti di Hyatt, e desaroyadonan di e proyecto a continua cu e prome fasenan di e ehecucion di e proyecto cu ta, entre otro midimento y test di e tereno. Manera Prome Minister Eman a menciona dia cu el a topa cu e delegacion di Hyatt, “Aruba ta logra un otro ‘milestone’ importante cu un hotel di cinco strea situa den centro di ciudad.”

- Advertisement -

DUNA COMENTARIO

Please enter your comment!
Please enter your name here