Home General “Vision di gobierno ta pa haci nos pais social y economicamente sostenibel”

“Vision di gobierno ta pa haci nos pais social y economicamente sostenibel”

0
0
SHARE
- Advertisement -

Prome Minister Mike Eman 

ORANJESTAD    (AAN):   “Nos ta para awe na inicio di un aña nobo, pero tambe na inicio di un periodo di gobernacion nobo”, Eman a bisa durante e prome conferencia di prensa di gobierno pa aña 2014, na unda a presenta e vision di Gabinete Mike Eman pa e periodo 2013-2017.

   Den e siguiente dianan e demas ministernan di Gabinete Mike Eman II ta duna nan presentacion riba nan perspectiva y responsabilidad pa loke ta vision di e gobierno nobo. “Nos di Ministerio di Asuntonan General ta pone e liñanan grandi, e contexto y e cuadranan dentro di cual nos lo kier mira  e vision aki realisa, dentro di e tempo stipula”. 

     Eman a bisa su audiencia cu e maneho pa e siguiente periodo di gobernacion ta bay ta uno basa riba crea un desaroyo sostenibel. No unicamente sostenibel den e sentido di energia. “Nos tin un meta grandi pa na 2020 Aruba logra bira un isla cu ta draai 100% riba energia sostenibel loke ta di sumo importancia pa un ecologia sostenibel. Ecologia sostenibel no ta solamente aplicacion di energia sostenibel, pero e ta tambe importante den e contexto cu locual nos haci riba e mundo aki, nos mester corda semper cu loke nos Creador a crea pa nos mester wordo cuida pase pa e siguiente generacion den e miho forma posibel.” Haciendo uso di un metaforo pa splica su punto di bista Prome Minister a bin cu e comparacion cu un mata di fruta cu ta bonda y duna hopi fruta. Mester wak bon pa e mata, reparti su frutanan entre e comunidad pa tur hende por gosa optimalmente di dje y percura pa e mata perdura pa esnan cu ta bin despues.

    “Esaki ta e aspecto fundamental di un maneho sostenibel”, Eman a bisa. Tambe e mandatario a splica cu den un pais caminda tin necesidad, caminda tin pobresa, caminda tin diferencianan grandi entre rico cu pober, un pais caminda e ciudadano no ta sinti su mes representa, e no tin participacion, unda no tin transparencia ni husticia no ta un sociedad sostenibel. Un sociedad asina ta revoltea, pasobra e no ta contento. “Ta pesey cu un di e aspectonan cu nos a pone hopi enfasis riba dje den e periodo di gobernacion cu ta tras di lomba y den e periodo nos dilanti mas ainda, ta pa haci nos pais social y economicamente sostenibel. Un pais caminda cada ciudadano ta sinti cu e ta parti di futuro di e pais. Cu e ta toca parti den entradanan, den responsabilidad, den oportunidad di educacion, di cuido di nos grandinan y di nos muchanan. Cu tin husticia y husticia social den e pais. Esey bo por logra unicamente dor di un maneho caminda ta reparti bienes y oportunidadnan, pero tambe responsabilidadnan. Tur esaki haci den un forma sostenibel”.

- Advertisement -

DUNA COMENTARIO

Please enter your comment!
Please enter your name here