Algun ciudadano consterna cu maltrato y morto di hoben agredi pariba di Nikki Beach

Publication: Tuesday, 14 January 2014. Categoria: General

ORANJESTAD (AAN) – Tin ciudadanonan cu a keda consterna cu e maltrato riba e hoben di 24 aña, pariba di Nikki Beach, ken a bin fayece dialuna mainta.

Aunke e causa no ta conoci tin rumornan ta core cu e mucha homber no tabata tin nada di haber cu e caso, solamente el a purba di defende un mucha muher cu dos mucha homber tabata maltrata.

Esaki ta un di e versionnan cu ta circula, pasobra manera ta conoci, alomenos durante dialuna, no tabata tin claridad riba e caso ni un informe oficial di un of otro declaracion di posible testigo.

Cual cu sea loke a sosode, ta masha tristo e tipo di violencia cu por constata un biaha mas, cu tin na Aruba tanto den cierto adultonan como den parti di nos hubentud.

Si berdad ta asina cu alcohol y droga por a hunga un rol den e sucedido ta algo cu mester sali na cla door di investigacion, pero nada ta hustifica e tipo di agresionnan bestial aki.

Aruba ta un isla hopi chikito pa tanto cos grandi sosode, manera e crimen aki pasobra no por yame cu otro nomber.

No ta prome biaha cu un hende, sea adulto of hoben, ta para na Hospital bon bati riba nos pida baranca aki, y esaki ta un di e biahanan cu maltrato a cobra bida di un hende.

Algun ciudadano a indica cu pa nan, no tin speranza mas pa nos pais y cu den tempo di carnaval tin asina tanto bebemento y uso di droga, cu mas di un hende ta perde control y ta comete tur sorto di actonan condenable.

Tin personanan cu ta culpa e libertinahe cu carnaval ta trece cune, y e parti di materialismo cu ta envolvi den dje, pasobra e ta trece turistanan pa nos Isla y turismo ta nifica placa na prome lugar.

Berdad, hopi decepcion e desaroyonan cu ta tumando lugar na Aruba ta causa na diferente ciudadano cu ta corda con den pasado carnaval tabata otro, tabata un fiesta nacional, algo di cual grandi y chikito por a goza sin ningun temor. Leu, leu tabata tin un of otro incidente, pasobra semper tin hende cu ta daña ambiente, pero nada tabata sosode di un magnitud asina, manera ultimo temponan ta e caso.

Personanan cu a yama a expresa nan sentimentonan di solidaridad pa e famia di e hoben, nan deseo pa e caso wordo aclarea y cu esnan culpable paga pa nan delito cu tur peso di ley. Cu e hoben aki sosega na paz y DIARIO tambe ta uni na e palabranan aki.

Leave a Reply