Home Hudicial Castigo condicional exigi contra pastoor acusa di mishi cu partinan intimo di...

Castigo condicional exigi contra pastoor acusa di mishi cu partinan intimo di mucha di 11 aña

1
0
SHARE
- Advertisement -

Tanto victima como acusado a basha lagrima den corte

ORANJESTAD(AAN): E pastoor E.A.T a presenta dilanti di Huez na Corte renoba di Husticia na Aruba riba Diahuebs, pa motibo cu el a wordo acusa cu na Juni 2011 el a mishi na un manera inapropia cu un mucha muher cu e tempo ey tabata tin 11 aña.

Segun e denuncia, e pastoor kende ta duna les di piano lo a mishi cu pecho y parti intimo di e mucha muher y e lo a pone e mucha muher mishi cu su parti intimo.

E lo a pone su boca tambe pa e pechonan di e mucha muher.

Segun procesverbal di polis e mucha muher lo a conta su ruman muher locual a sosode.

Mama di e victima a declara na polis tambe cu e pastoor a yame y a bise cu e tin bon noticia.

E bon noticia segun E.T lo tabata cu e mucha a dune permiso pa mishi cune na su pecho y su parti intimo.

E.T semper a para ariba cu e no a hasi nada di e cosnan ey.

Un rato durante tratamento di e caso, e mucha muher victima kende tabata presente den sala di corte, a cuminza yora y su mama tabata console.

Fiscal a hasi varios pregunta na e acusado pa haya sa mas detaye.

Lo tabata tin tambe un otro mucha cu lo a bisa cu E.T a mishi cune, pero cerca polis e mucha muher a declara cu esaki no ta berdad.

Huez a puntra e acusado si e sa dicon e mucha muher y su mama lo bin cu e acusacionnan si esakinan no ta berdad.

El a bisa cu e no sa, pero cu e ta kere cu ta quizas door cu su casa, lo a pone mama di e mucha muher na su lugar un biaha.

Fiscal na dado momento a splica cu e parti dificil di casonan di comete actonan inmoral contra un menor di edad of adulto hopi biaha ta cu ta fastioso pa haya suficiente evidencia.

Pa ley un solo declaracion no ta suficiente, sin cu tin prueba adicional.

Den e caso aki fiscal a bisa cu e ta haya cu ta suficiente cu e mama y e ruman muher di e victima a confirma tur cos.

El a duna un ehempel di un caso unda cu no tabata tin mester di hopi extra evidencia pa condena e acusado.

 E fiscal a bisa cu e casonan aki ta sumamente serio y locual ta hasi cos peor ta cu e mayornan ta manda nan yiu pa haya les y no ta spera cu algo asina por pasa.

Banda di esaki como Pastoor e persona mester ta un figura cu hende por pone nan confianza den dje.

Locual ta conta na fabor di e acusado ta cu nunca antes el a yega di haya su mes den problema cu husticia y cu e caso ta uno di mas di 2 aña.

Fiscal a exigi un castigo di 120 dia, di cual e 25 dianan cu E.T a sinta caba ta incondicional.

E 95 dia cu resta mester keda colga riba su cabez como castigo condicional durante un tempo di prueba di 2 aña.

Banda di esaki fiscal a exigi pa E.T hasi 180 ora di trabao pa comunidad.

Abogado Chris Lejuez representando E.T a indica na huez cu e declaracionnan di mama y ruman muher di e victima ta trece hopi duda.

Lejuez a bisa huez cu ta hopi dificil di kere locual e mama a trece dilanti.

Pues cu un homber grandi ta yama mama di un mucha muher di 11 aña, pa bisa cu e mucha a dune permiso pa mishi cu su pechonan y partinan intimo.

El a bisa tambe cu e ruman muher despues a bin cu e storia cu e homber lo a yama mama di e mucha pa pidi permiso pa mishi cu su yiu.

E dos declaracionnan aki segun Lejuez ta cosnan increibel pa kere.

E abogado a bisa tambe cu e mama a declara na polis cu na varios occasion el a puntra e mucha si E.T a mishi cune na un manera inmoral y cu e mucha a nenga.

Ora cu el a sigui puntra, e mucha a bisa cu si.

Lejuez a haya straño cu e mama ta djis Sali puntra e mucha si e homber a mishi cune.

E abogado a bisa tambe cu si e homber berdad a yama e mama y a bisa cu el a haya permiso for di e mucha pa mishi cu e mucha, ta straño cu e mama no a bay polis mesora.

Despues cu e victima a basha lagrima, awor ta e pastoor tabata seca su lagrimanan den sala di corte.

Lejuez a sigui cuestiona declaracion di e mama y ruman muher y el a bisa cu despues di tur cos ainda e mama a bin cu otro storia straño unda cu e lo a bisa polis cu e pastoor a yega di bay cune banda di drive inn y eynan e lo a uza un zeta special y mishi cu e mama bay di su saya, pa core cu cierto spiritonan malo.

Fiscal a insisti cu e ta kere cu e declaracionnan di e mama y ruman muher ta mustra cu E.T ta culpable.

Huez na final a bisa cu e lo duna su veredicto dia 30 di Januari.

- Advertisement -

DUNA COMENTARIO

Please enter your comment!
Please enter your name here