Home Editorial EDITORIAL: UN AñA NOBO SIN INCENTIVONAN REAL

EDITORIAL: UN AñA NOBO SIN INCENTIVONAN REAL

0
0
SHARE
- Advertisement -

            Mi no sa con otro hendenan ta mira e apertura di 2014, pero ami ta mire cu cierto preocupacion pasobra tin cosnan cu mester a ser soluciona caba, y tog ta sigui nan cursonan robez. Te ainda mi no ta mira incentivonan real cu por obligami bolbe kere den e capacidad di e Gobierno actual.

Un di problemanan nobo ta e yegada di tanto hende for di Venezuela, cu di un banda berdaderamente a faborece nos isla comercialmente, pero di otro banda a perhudica nos ciudadanonan tambe cu e blokeo cu nan a haci di e cuponan di avion, especialmente pa Merca. Y mi no ta mira Gobierno move un dede pa trece e situacion bao control, o por lo menos balancie pa tanto e venezolanonan como nos keda satisfecho cu e solucion.

Nan a trece tanto demanda pa e cuponan di avion cu hasta e prijsnan a bay halto, y lo mi bisa irazonablemente halto. Pa haya un cupo pa bay Miami den e dianan aki bo mester bira un milagrero, pasobra simplemente nan no ta existi den bista di tanto demanda.

            Mi ta compronde cu e Ministronan tabata merece un vacacion y a bay Europa den un grupo grandi pa monta un show berdaderamente spectacular, y cu a dura mas di diez dia. Pero, te awe mi no a tende nada di loke por a ser logra durante nan estadia y con e ta bay faborece nos isla. Di e tram mi no ta bay bisa nada cu mi no a bisa caba, y di e klinkernan tampoco. Ya tur hende conoce mi opinion al respecto. Opinion cu no a cambia!

            Mi no sa kico a pasa cu e asunto di Dialogo, pero segun e cosnan cu tin a la bista, e no por a yega na un conclusion favorable, pasobra hopi (si no ta mayoria) di e sindicatonan a bula afo ora cu nan a mira cu ta nos mes, o sea Pueblo, ta bay carga e peso di e medidanan. Aki no tin espacio pa gañamento. Hopi asunto basico a aumenta, y mas ta bay sigui. Ta kico nos a haci pa merece un Gobierno asina letargico?

            Antes, AVP tabata un partido cu tabata tene sesionnan di discusion riba hechonan concreto, pa consolida e puntonan di bista y saca conclusionnan basa riba realidad, pero ultimamente nan ta djis bay tras di loke nan a tende, loke nan ta pensa, o loke nan ta kere. E ta un deterioro cu no ta saludable pa e partido.

            Y pa loke ta trata e composicion di Gobierno mes, o sea e Ministronan, ta parce cu ken sea a escoge nan a pone nan sinta den un circulo rond di dje, a cera su wowonan y a mustra dede den cualke direccion, y esun cu e dede a indica a logra e nombramento. Pasobra mi no por imaginami cu algun di nan a ser escogi cu wowonan habri apesar di nan fracasonan gigantesco den e Gobierno anterior. Tin un bon representacion entre nan di un mediocridad absoluto, banda di algun cu tin e merito necesario pa ocupa e puesto.

            Esaki ta mi opinion na cuminzamento di aña, opinion cu por cambia si e situacionnan precario cu tin nos dilanti cambia. De lo contrario e ta keda mi opinion sin variacion algun. 

 

- Advertisement -

DUNA COMENTARIO

Please enter your comment!
Please enter your name here