Home General Lider di MEP ta sigui cu politica bao di nivel y su...

Lider di MEP ta sigui cu politica bao di nivel y su declaracion “ta tribi!”

0
0
SHARE
- Advertisement -

Prome Minister mr. Mike Eman:  

ORANJESTAD (AAN) – Como “politica bao di nivel” y “un poco tribi” Prome Minister mr. Mike Eman ta califica e declaracionnan di lider di Movimiento Electoral di Pueblo (MEP) sra. mr. Evelyn Wever-Croes.

Palabranan di e parlamentario y lider di fraccion di MEP, durante e prome conferencia di prensa pa inicia 2014, ta cu e gobierno di AVP ta esun di mas corupto den historia di Aruba y esaki den contexto di locual su partido lo hiba como tema na e congreso di parlamentarionan di Reino Hulandes, cu ta tumando lugar na Curacao e siman aki, pa loke ta concerni e punto di Integridad.

Prome Minister, den entrevista cu Matutino DIARIO, a reacciona riba e declaracion di sra. Wever Croes, ken ta acusa gobierno y e parlamentarionan di AVP di labamento di placa y link cu criminalnan.

E dignatario a expresa cu por mira cada bez e mesun politica aki, pero su gobierno realmente a bin pa trece dilanti politiconan cu integridad y aumento di edad di pension di e politiconan ta un ehemplo.

“ Esaki pasobra nos a haci un escogencia pa nos ta, enberdad, sirbido di pueblo. No ta interesa nos beneficia nos mes cu hendenan cu relacionnan dudoso of personanan cu ta cerca di nos pa enrikece nos. Semper nos a scoge pa pone e pueblo di Aruba prome y esey e pueblo a scoge pe tambe”, e dignatario a subraya.

Premier mr. Eman a agrega cu ora gobierno ta ripara cu tin algo cu no ta bon, nan ta para e relacion y esey a sosode cu e Gobernador di La Guajira cu a bin Aruba en conexion cu “Americas meets Europa” y cu gobierno a conoce como dos aña pasa.

“ Semper nos tin relacion cu presidente, gobernadornan, y nos tin cu asumi cu nan tin un posicion pa cual nan a wordo elegi den e pais, y tanten cu no tin nada riba nan nos ta trata cu nan manera amistadnan, manera nos a haci cu tur otro gobernador, alcalde y presidente na mundo”, e dignatario a remarca.

Prome Minister a indica cu despues di nan periodo nan ta wordo acusa di algo, dificilmente gobierno di Aruba por wordo culpa di esaki.

Bolbiendo na e declaracionnan di sra. Wever-Croes e dignatario a comenta cu e ta hiba un politica bao di nivel, mirando cu e cantidad di hende cu gobiernonan ta topa y cu despues ta wordo persegui den nan pais, ta asina hopi den mundo cu no por pone otronan responsable.

“ Otro tabata si e tabata un persona conoci pa cosnan robes y tog nos lo a mantene relacionnan cune”, Prome Minister a reitera.

El a trece dilanti ademas, cu Embahadanan di Hulanda ta haci screening pa gobierno di Aruba si tal of cual persona ta bon pa anda cu nan, y na momento cu gobierno ta haya otro indicacion, sea di Embahada di Reino of otro fuente, e ta tuma su decisionnan y asina a sosode tambe den e caso di e persona concerni cu a haya su mes envolvi den asuntonan robes na Colombia.

“ Di biaha nos a corta tur lazo cune, y nos a dicidi pa no firma e MOU mas pasobra e persona aki tin su problemanan den Corte na Colombia”, e mandatario a menciona.

Prome Minister a expresa cu esaki ta otro di locual por tende di partido MEP cu mundo ta bisa cu un persona tin relacionnan dudoso pero nan ta continua cu esaki.

“Esaki ta otro cu ora un persona tin un funcion oficial, y gobierno tin un relacion oficial cune, y despues ta bin resulta cu tin algo y ta wordo avisa door di medionan di comunicacion of door di Embahada di Reino y mi a informa esaki na Staten”, Prome Minister Eman a señala.

Aunke MEP ta sigui cu e politica aki, Premier Eman a expresa, den curazon di nos pueblo ta hopi cla kendenan ta cana e caminda integro sinceramente, cana den pueblo henter dia, ta traha na beneficio di cada yiu di tera pa bay dilanti, y kendenan, pa añanan den gobernacion a mara nan mes na personanan hopi dudoso y cu a probecha di e beneficionan di nos pais te awe, pasobra gobierno ta mara na contratonan asina.

“ Mi ta spera cu si sra. Evelyn Wever- Croes ta bay tira cu e lodo aki, cu e berdad tambe di parti di sr. Herde presenta cu si ta e berdad y cu a sali den rapportnan di Hulanda tambe, con nan a chica e pueblo aki rancando placa for di pueblo pa enrikece nan mes y di e relacionnan, tambe tin documentonan oficial di diferente personahe clave di MEP”, Prome Minister a declara.

El a conclui bisando cu si den e direccion aki mester bay e ta spera cu señor Herde debidamente, presenta e berdad di locual gobierno ta drechando na Aruba.

Prome mandatario a referi na banco BBA cu tin vinculo na Aruba, entre otro asuntonan cu ta importante den e proceso aki si e debate wordo hiba den Parlamento di Reino, pa tur cos wordo treci dilanti pa e comunidad paden y pafo por tin un bista di ken realmente ta cana cu integridad.

E mandatario a bisa tambe cu gobierno den su prome mandato a tuma pasonan ora a haya informacion tocante un parlamentario di fraccion di AVP, ya sea cu el a wordo confirma of no, y debidamente e fraccion e momento ey a pidi e colega pa tuma su distancia, y esaki ta cosnan cu AVP ta haci pa mantene e integridad di su organizacion politico, locual no por bisa di otro cu ta pone hende cu un record asina riba lista, y tin otronan prominente den e fraccion cu e tipo di cosnan asina.

“Mi ta kere cu ta un poco tribi for di un lider asina, cu tur e realidad aki, presenta e tipo di acusacionnan aki. Pero si esey ta e caminda, el a bay di diesdos pa diesun y despues pa siete, door di e forma aki di hiba politica y no di mustra amor pa su pais ni dedicacion pa sirbie, pero djis kibra otro cu e tipo di politica asina y nos ta hopi convenci cu esaki no ta locual e pueblo di Aruba ta desea, y definitivamente dia 27 di September, pueblo no a vota pa esaki!” Prome Minister mr. Mike Eman a conclui.

- Advertisement -

DUNA COMENTARIO

Please enter your comment!
Please enter your name here