Un di e prioridadnan halto ta material pa school
ORANJESTAD (AAN): Pais Aruba ta inverti den su presupuesto pa medio di Ministerio di Enseñansa un suma alrededor di 240 miyon Florin anualmente. Un suma considerabel, pa cual Minister di Enseñansa, Michelle Hooyboer-Winklaar, den su maneho pa 2013-2017 ta poniendo enfasis y ta exigi pa sondea e prioridadnan, eficiencia di uzo y resultadonan, o sea e efectividad, di cada inversion.
“Actualmente nos tin bista den liña nan grandi con e fondonan ta worde distribui. Un gran parti di e presupuesto bayendo pa paga salario di docentenan. Pero banda di esaki mester analisa tur detaye, riba un nivel hopi micro cu hopi biaha no ta obvio ora di analisa e finansa, unda nos por crea mas eficiencia y pues rek e placa mas leu door di tuma decisionnan financiero a base di e prioridad cu nos lo mester stipula. Un di esakinan mester ta material adecua pa cada school.” E mandatario a laga di conoce durante su presentacion ultimo.
“Con ta posibel cu nos tin 240 miyon y nos no tin buki den tur klas, nos ta uzando copia?” Minister Hooyboer-Winklaar a subraya, splicando su posicion fuerte pa stipula prioridadnan, traha mas eficiente y efectua control estricto riba inversionnan den enseñansa. Sin buki disponibel pa tur, nos no por tin expectativa grandi pa nos studiante.”
No ta descarta cu lo tin casonan unda cu si mustra cu tin uzo ineficiente di placa, pero e inversion ta necesario, lo por yega na combina factornan pa yega toch na e resultado final desea. Mester evalua cada factor pa saca e mayor beneficio di cada accion, decision y inversion.
Dos ehempel concreto ta e hecho cu cada school-bestuur ta bestel material apart. Si ta dispuesto di haci esaki combina na unda cu por, lo por baha gasto inmediatamente. Tambe nos ta mira varios school unda tin airco ta draai 24 ora. Mester por yega na un manera pa por baha e gastonan operacional door di reduci gastonan di utilidad conhuntamente cu yudansa di Gobierno.
E mandatario a splica tambe cu tin hopi informacion general pa comparti, pero tambe tin otro informacion relevante y importante den e ramo aki cu mester ta conoci. E informacion aki, incluyendo estadisticonan, mester worde aplica pa guia diferente proceso di cual e indicadornan, o sea resultadonan, ta worde uza pa analisa y determina e necesidad pa cambio y adaptacion, pero tambe unda cosnan ta bayendo bon.
Informacion general cu ta obtenibel ta indica por ehempel, cu na cuminsamento di aña escolar 2012-2013, incluyendo tur nivel y tipo di school, Aruba tabatin 21.182 alumno, 1412 docente y 83 school. Esaki ta inclui e comunidadnan na nos schoolnan preparatorio, basico, secundario y post secundario.
Minister Hooyboer-Winklaar su maneho ta dirigi na tuma accionnan y decisionnan basa riba prioridadnan unda ta desea y necesario, pa na final di dia haci di e experiencia “enseñansa” na Aruba uno cu ta duna resultadonan satisfactorio y ta hisa e calidad di e experiencia aki en general pa e alumno, e maestro y e mayor.
E resultadonan beneficioso lo refleha den desaroyonan positivo pa nos comunidad, no solamente den e ramo laboral y comercial, pero sigur pa cu e desaroyo individual di e ser humano.
Minister Hooyboer-Winklaar a conclui bisando cu na final di dia cada decision sea ta relata na e aspecto financiero, curiculo, metodo of organizatorio mester tin 1 solo meta poni su dilanti, y esey ta mehora e logro di e studiante y crea e miho sistema di enseñansa posibel.
