Home General Negoshi na San Nicolas a wordo cera inmediatamente debi na djaca y...

Negoshi na San Nicolas a wordo cera inmediatamente debi na djaca y opera sin permiso

0
0
SHARE
- Advertisement -

Cantidad di violacion nota na Playa tambe…

ORANJESTAD (AAN): Semper Matutino DIARIO ta aplaudi ora cu tanto Departamento di Salubridad Publico, y tambe Polis ta tene control riba negoshinan cu ta bende comestible, of esnan cu ta bende cuminda.

   Hopi biaha ta tende di informe di Polisnan di Noord cu semper tabata haci bon control riba e.o. Restaurantnan, pa asina purba di reparti multa y duna indicacion na e comerciante, kico ta malo of bon di su operacion.

   E siman aki, autoridad tanto na San Nicolas y Oranjestad a bay haci chequeo riba negoshinan.

   Cuminzando na San Nicolas riba Diaranzon, den dia cla durante cu patruya di San Nicolas tabata tene control na un negoshi situa den Bernardstraat, nan a bin nota varios asunto robez.

   E control na e negoshi aki den Bernhardstraat tabata ser ehecuta  hunto cu personal di Salubridad Publico.

   A keda constata cu e negoshi pa colmo no tin permiso legal, siendo cu abiertamente bebida alcoholico ta worde bendi.

   Polis hunto cu esnan di Salubridad Publico, tabatin un lista di diferente keho y denuncia haci ultimo temponan, principalmente di bisiñanan cu ta disgusta cu ta mira asina hopi djaca ta core rond di e negoshi.  Fuera di esey Polis sa cu e negoshi ta produci hopi boroto y molester di musica.

   Den pasado, na diferente biaha Polis a presenta pa atende problema y na diferente ocacion, hunto cu Salubridad Publico control a tuma lugar na e negoshi, pa cual tur locual ta alcohol, a worde confisca.

   Personal di Salubridad Publico e biaha aki tambe a traha process verbaal relaciona cu e situacion inhigienico y e Take Away a worde cera mesora (per direct) despues cu a traha verbaal contra e señora inicial L.A.D.i.C. naci na Republica Dominicana di 54 aña di edad.

   Den futuro, e negoshi y e persona aki lo por haya dificultad ora e bay pidi permiso nobo, pasobra e mal record aki lo keda poni pa semper riba su nomber.

   CONTROL DIAHUEBS

            NA PLAYA

Diahuebs atardi laat autoridad a drenta e barnan cu tin den Emanstraat y cu ta wordo maneha mayoria pa hendenan di Republica Dominicana biba na Aruba. Pa algun tempo caba e kehonan ta hopi riba e barnan cu tin den Emanstraat mirando cu algun di e doñonan no ta paga un compania of un bari pa tira nan sushinan di negoshi.

    Loke a pone e situacion bira serio ta ora nan ta paga chollernan algun cent y nan ta bai cu e sushi benta esaki unda cu ta tambe. Netamente den centro di ciudad na diferente parti cu a wordo haci limpi e sushedadnan aki ta end up atrobe.

   E departamento di City Inspector y tambe Serlimar tabata tin basta trabou pa controla y vigila e autornan. Cada biaha e storia cu no sa ta kende a tira sushi ta bin dilanti. Diahuebs si e situacion a yega asina leu unda e diferente departamentonan di control di gobierno a reuni y ataka e problema.

   E departamento di Salubridad Publico cu GKMB, Bomberonan su departamento di control, e departamento di Serlimar, City Inspector y tambe Polis hunto a haci e atake. E minister di husticia tambe a pasa pa mira e situacion for di pafo cu su mesun wowo. A tuma nota cu tabata tin criadero na diferente parti rond di e barnan, tabata tin tambe un of mas bar cu no tin bari, a tuma nota cu algun caminda tin wayanan di coriente ta core di un lugar pa otro contra tur seguridad.  Wayanan tur gekonkel, mara na otro na forma peligroso, facil pa causa un corto circuito.  Compressor di Airco poni asina riba acera, strobando fluho di peaton.  Bo ta realmente kere cu ta na Santo Domingo bo ta.

   Tur e puntonan aki a atende seriamente cu cada persona cu ta encarga cu e lugarnan. Esnan trahando den bar tambe a wordo controla pa e papelnan di sanidad. Tabata tin lugarnan cu a wordo sera por ehempel pa motibo cu no tin awa mes den e negoshi. Tin cu a yega di haya advertencia caba anteriormente pero parce cu ta accion mes mes mester a tuma e biaha aki.

   Pais Rumshop y tambe Tituaaa ta e dos negoshinan cu a wordo sera y diabierna nan mester bai atende nan asuntonan. Polis a keda di vigila e negoshinan aki durante anochi y si nan habri tog e multa lo bin mesora su tras.

- Advertisement -

DUNA COMENTARIO

Please enter your comment!
Please enter your name here