Home Editorial Editorial: HOPI PLAN PA EHECUTA DEN PROXIMO 4 AÑANAN

Editorial: HOPI PLAN PA EHECUTA DEN PROXIMO 4 AÑANAN

0
0
SHARE
- Advertisement -

                Mi no sa cu kico Gobierno ta contando pa ehecuta tur e plannan cu nan a anuncia na cuminzamento di aña, pero mi ta supone cu ya nan a haci nan huiswerk pa logra determina e fuente di financiamento sin sigui impone medida riba Pueblo. Esnan cu nan a pone caba ta basta pasobra Pueblo no por carga mas.

                Si logra ehecuta tur e plannan anuncia, Aruba lo conoce otro cara fisico den futuro, y uno cu lo impresiona tur hende. Nos a viaha hopi caba riba e caminda di porvenir, y hopi cos a cambia recientemente di aspecto: caya grandi, e plazanan rond di dje, e aceranan cu a haya klinker, e spoornan cu a reduci e hanchura di varios caya y ta bay causa probable problemanan di transito, enfin cosnan mes visible cu e tram o trolley cu ta keiro na su antoho di waf pa caya grandi y back.

                Turismo a crece hopi, danki na un maneho acerta di Otmar, y varios Ley laboral a ser modifica pa faborece e trahador sin tene na cuenta e peso cu nan ta representa pa comercio, especialmente esnan chikito cu di mes ta lucha pa mantene cabez riba awa y ta mirando nan posicion den e mercado na peligro.   Ta parce cu nan a ser introduci durante eleccion, cu bista riba votonan, y no tumando na cuenta e realidad di e consecuencianan cu nan ta bay crea pa comercio, especialmente esnan menos grandi. Pesey nos ta papia di acierto (turismo) y desacierto (leynan o medidanan laboral).

                Di tur manera Gobierno a sigui cosecha exito cu su programanan ehecuta caba o den via di ehecucion. Sinembargo, e aumento di criminalidad a sigui sin tuma na cuenta e Ministro di Husticia cu ya den pasado a fracasa caba pa pone un fin, o por lo menos un control riba dje. E tercio cu ta skirbi Analisis Politico por wel di elogia o kere den e Ministro ey, pero pa nos e no ta sirbi, e no a cumpli cu su debernan den pasado, y nos ta duda cu e lo por cumpli cu nan durante e proximo añanan. Su record mes ta condene.

                Mi ta anticipa cosnan bon for di Gobierno, y mi ta convenci cu si nan kier, nan por. Ta  mi deseo pa tur cos bay bon pa Aruba, sin e necesidad di castiga Pueblo cu mas aumento, ya cu e ta sobrecarga caba y no tin espacio pa mas imposicion. Mi ta convenci tambe cu durante e proximo añanan, Gobierno lo haya e forma di nivela o por lo menos controla su finanzanan, pasobra nan ta den un caos total. E mester kibra e molde cu ta bisa cu tur Gobierno democrat (o sea cu tin e filosofia politico ey) gusta un Gobierno grandi y gastamento di placa mas grandi ainda. Esey ta un di e problemanan cu Merca tin actualmente, o sea un Gobierno democrat cu gusta gasta placa sin control. Ohala nos Gobierno siña di dje y di otronan di e mesun filosofia politico ey, cu a la larga, loke nan ta logra ta abulta e debe di e pais na un manera colossal y sin solucion a la bista. Di mes esun di nos ta hopi halto y tin mester di medidanan urgente pa trece bao control, y si e posibilidad presenta, bahe radicalmente, o elimine. Ban spera!

 

               

- Advertisement -

DUNA COMENTARIO

Please enter your comment!
Please enter your name here