Home Hudicial Castigo di 4 aña y mey exigi, contra homber cu a comete...

Castigo di 4 aña y mey exigi, contra homber cu a comete actonan sexual inmoral

0
0
SHARE
- Advertisement -

 *Victima mucha di 11 aña y cu limitacion mental y fisico grandi

ORANJESTAD (AAN): Diabierna sospechoso F.I.C a presenta dilanti di huez na corte di husticia, debi na e hecho cu el a wordo acusa di comete actonan sexual indebido, cu yiu muher di 11 aña di su pareha na Mei 2013.

Segun procesverbal di polis, ora cu un dia F.C a yega cas y mester a wak pa e mucha, na dado momento homber a probecha di e momento cu e tabata su so cu e mucha.

Mama di e mucha a hasi e denuncia na polis, despues cu el a topa sanger den Pampers di e mucha, cu ta un mucha cu un incapacidad mental y corporal.

E mucha a nace cu un defecto cu ta pone cu e ta ciego tambe y practicamente no por comunica cune. Banda di esaki e no por cana ni gatia y pesey net e tin mester di cuido, atencion y cariño.

Pesey segun fiscal, e tipo di crimen aki ta uno hopi serio. Wela di e mucha a ripara cu algo no tabata bon, ora cu el a wak e mucha ta morde riba su diente y actua straño.

Nan a hibe docter y e docter a constata cu parti intimo di e mucha a wordo penetra y cu e tabata tin herida na e parti intimo y patras tambe.

F.C na dado momento a admiti cu el a comete actonan indebido cu e mucha. A tuma DNA di F.C y a compara esaki cu locual a wordo haya na pampers di e mucha y den parti intimo di e mucha.

No por a wordo determina si e material biologico cu a wordo haya tabata sperma of no, mirando cu e cantidad tabata mucho chikito.

For di e pampers tampoco por a saca afo si tabata sperma, mirando cu ora cu e pampers a yega Hulanda pa e testnan wordo hasi, e material tabata daña caba. F.C a admiti sinembargo.

El a bisa cu el a yega cas hopi burachi y el a drenta camber di e mucha.  Segun F.C, e no a penetra e mucha cu su penis sino cu su dede. Mientras cu e tabata hasi esaki, e tabata mishi tambe cu su mes.

El a bisa sinembargo cu e no a eyacula y cu el a spanta y el a stop cu locual e tabata hasi, ora cu el a wak sanger riba su dede y ora cu el a hole sanger.

Den corte fiscal a puntre dicon e no a yama docter ora cu el a wak y hole e sanger y el a bisa cu e no ta corda. El a bisa si cu e ta lamenta locual el a hasi y cu su intencion ta pa haya tratamento pa stop di bebe alcohol.

Fiscal a puntre si e ta kere cu ta alcohol so ta e problema y el a bisa cu si. El a bisa cu e ta dispuesto pa bay rehabilita na Corsow.

Fiscal a sigui puntra F.C con e por a hasi algo asina y el a bisa cu e mes no sa, pero cu pesey e kier stop di bebe alcohol. Fiscal a bisa tambe cu den dossier di e caso ta wordo menciona cu su propio ruman muher a declara cu F.C no tabata burachi.

Huez a repasa tambe e rapportnan di reclassering, psicologo y psiquiatra.

E rapportnan ta menciona su problema di alcohol, pero  F.C no tin problema mental, pues e por wordo teni responsabel pa su actonan.

Fiscal na dado momento a splica con serio e limitacionnan di e mucha ta, ora cu el a nace cu un defecto causa pa un infeccion durante embarazo di e mama. El a splica cu e mucha practicamente no por comunica, pero cu su primonan cu ta wak pe tin biaha, ta bisa cu ora cu nan caricia y menciona su nomber e ta haya un sonrisa riba su cara.

Fiscal a sigui bisa cu tur mucha y sigur uno cu tin limitacion mester wordo proteha y ta net pareha di e mucha su mama no a protehe, sino a probecha di dje.

El a haya hopi reprochable cu F.C a penetra parti intimo di e mucha asina profundo cu dos dede, cu esaki a cuminza sangra. El a bisa tambe cu inicialmente e acusacion tabata cu e homber a uza su parti intimo pa penetra e mucha, pero door cu no por a confirma cu e material biologico tabata sperma di F.C, no por acusa F.C di esey.

E fiscal a indica cu mester mehora e parti di preservacion di material y evidencia na Aruba, specialmente e material cu ta rekeri di wordo warda den un lugar frieu etc.

Na final fiscal a exigi un castigo incondicional contra F.C di 4 aña y mey.

Abogado Nicolaas a trece dilanti cu F.C mes ta admiti cu e problema grandi cu e tin ta su adiccion na alcohol y cu e kier wordo trata pa esaki. E abogado a mustra riba e hecho cu for di 2004 cu mama di F.C a fayece, e no a logra deal cu esaki hopi bon. El a perde  e persona cu semper tabata dune bon guia.

Huez na final a bisa cu e ta bay duna su veredicto riba 4 di April.

- Advertisement -

DUNA COMENTARIO

Please enter your comment!
Please enter your name here