Director di Serlimar sr. Richard Fingal :
ORANJESTAD (AAN) – Director di Serlimar, señor Richard Fingal, a señala cu ta bon conoci na Aruba cu entre dos aña y un aña y mey pasa, e servicio di Serlimar tabata “total los”.
Hopi biaha nan mester a bay piki desperdicio manera medicina, angua, etc., for di riba caminda pasobra e pomp di e truck no tabata traha, y e compania tin registro di centenares di yamada di keho pa siman, cu Serlimar tin registra di e temponan ey, tocante e mal servicio.
Hopi biaha nan a ricibi bishita di Salubridad Publico pa revisa e trucknan, y e trahadornan mester a traha hopi oranan extra den fin di siman, pasobra nan no por a recoge e sushi pa motibo cu no por a lanta sushi den siman, debi cu e trucknan tabata den garashi pa drechamento.
E palabranan di director di Serlimar a surgi despues cu el a wordo puntra pa prensa, kico e ta opina di e declaracionnan di parlamentario Siomara Ruiz-Maduro di MEP, cu durante e gobernacion di MEP Serlimar tabata duna hopi bon servicio.
Relaciona cu e mesun parlamentario aki cu a cuestiona, cu Serlimar lo cobra un tarifa di 35 florin pa lanta sushi domestico y cu esaki ta un medida, director sr. Fingal a ripiti locual den diferente ocasion el a trece dilanti, cu Serlimar tin derecho di cobra, pasobra tur parti di mundo tur hende ta paga pa recogemento di sushi.
Segun e director di Serlimar ningun momento e ta un medida, pero ta parti di e servicio cu tin cu paga pe.
El a reitera cu un bez cu e servicio di Serlimar drecha cien por ciento por introduci un pago, y e suma te aworaki no a wordo fiha. E mes nunca a tende di un suma di 35 florin, y e no sa ken a bin na dje, y esaki no ta riba mesa na e momentonan aki tampoco.
Si ta asina cu e compania ta den e proceso di studia con y cuanto nan ta bay cobra y e lo ta menos cu locual su competidornan (companianan priva) ta cobra.
El a agrega cu ta husto pa Serlimar cobra pa su servicio pasobra e ta un suigeneris y no ta haci ganashi. E tarifa, el a reitera, ta den estudio y lo no ta prome cu September en todo caso, cu e lo por drenta na vigor, si ta asina cu e lo introduci. Esaki ta poni caba for di 2005 den e Landsverordening cu Serlimar mester cobra.
Pero na 2006 den Staten a wordo bisa cu Serlimar no mag cobra y cu gobierno lo paga e suma ey na e compania. No obstante, den ley ta poni claramente mester cobra y hasta un suma ta wordo menciona eyden, cu ta trinta florin!
Mientras tanto, Serlimar ta para pa eficiencia, responsabilidad y efectividad, y nan ta purba pa nan personal mes haci e trabao aki, pasobra muy probablemente lo mester haci uso di otro compania pa yena e cobranza, y posiblemente na cuminzamento pa yena nan data base, lo mester di un par di persona pa termino cortico.
Un bez cu e sistema ta coriendo, no ta premira cu lo mester di hende specializa, director di Serlimar a subraya.
