Segun comunicado di MEP:
ORANJESTAD (AAN): Segun MEP, Director di Serlimar den un conferencia di prensa a confirma cu Serlimar ta bai cobra pa piki sushi. Segun e director na aña 2005 e ley a cambia y ta permiti pa cobra 30 florin, segun e. Pero Parlamento e tempo ey, di cual e mayoria tabata di MEP, a prohibi gobierno pa cobra e suma ey.
Locual e director ta bisando ta cu awor AVP kier pa cobra e suma ey si. Anto e argumento ta cu tur caminda rond di mundo ta cobra pa piki sushi.
Wel, locual e director mester tene cuenta cune ta cu no ta tur lugar na mundo nos tin un minister presidente asina gañado, cu tempo e tabata den oposicion tur cos tabata medida. Te hasta si solo sali 1 minuut mas laat Mike Eman tabata culpa Nel di a bin cu medida.
Awor, ta pesey e director di Serlimar mester compronde cu ora un ciudadano ta paga 0 florin pa piki sushi, y esun cu a pidi’e su voto den campaña a priminti’e cu e ta keda 0 florin, na momento cu bo his’e pa 30 florin e TA un medida.
Cu e conferencia di prensa aki director di Serlimar ta confirma tambe un biaha mas cu Mike Eman ta un gañado, pasobra el a gaña pueblo cu e no ta bin cu medida, y e prome cos cu e ta hasi ta bin cu medida. Esta un berguensa pa un pais tin un ministro presidente gañado asina.
