Home General 2.902 persona cu ta cobra bijstand lo wordo reintegra den e mercado...

2.902 persona cu ta cobra bijstand lo wordo reintegra den e mercado laboral

13
0
SHARE
- Advertisement -

Segun Minister di Labor den curso di dos aña:

ORANJESTAD (AAN) – Den conferencia di prensa di gobierno, Minister drs. Paul Croes, titular di Asunto Social, Maneho di Hubentud, y Labor, a duna un splicacion amplio tocante e proyecto importante di reintegracion di un grupo specifico di persona den nos mercado laboral.

E dignatario a señala cu e trayecto di reintegracion di personanan cu ta disfruta di bijstand den e mercado laboral, ta bay cu un apoyo emocional, social, motivacion pa trabao y e aspecto administrativo, unda ta acomoda un persona den un funcion cu ta refleha su cualidadnan.

Den cuadro di esaki e mandatario a gradici Departamento di Asunto Social, Departamento di Labor, Hurista y Conseheronan cu a traha dia y anochi pa e proyecto aki bira un realidad, y tur esnan cu a hinca den esaki nan experiencia y conocimento mirando e diferente obstaculo cu un persona di e grupo meta por confronta cune.

E dignatario a menciona cu e cantidad di personanan aki, te cu Februari 2014 cu ta ricibi un apoyo financiero di gobierno, pasobra pa un of otro motibo no por traha, ta 2.902.

E consecuencia cu e proyecto aki tin ta cu den un periodo di dos aña, di e cantidad menciona lo por reintegra rond di 500 persona den e mercado laboral.

Minister drs. Paul Croes a subraya cu e 2.902 persona cu ta cobrando bijstand ta nifica, financieramente, pa Gobierno 30 miyon florin anualmente.

Door di e proceso di reintegracion aki, acompaña pa motivacion pa trabao y trayectonan special, lo spaar cinco miyon florin cu automaticamente ta positivo tambe pa e finanzanan di gobierno.

E dignatario a menciona cu den e trayecto aki, no solamente e departamentonan concerni cu ta DPL, Departamento di Asunto Social y Departamento di Labor y Investigacion lo ta envolvi den e proceso aki, pero tin otro partidonan cu tambe lo forma parti di dje, pero lo tin protocolnan cu lo wordo cera individualmente cu cada un, pa motibo cu pa por reintegra e personanan aki den comunidad, mester yega na acuerdonan cu comercio, dunadornan di trabao, uizendburonan, y alavez lo haci esfuerzonan grandi cu e ferianan nacional di labor, pa asina por reintegra un cantidad di ciudadano back den nos mercado laboral.

E esencia di e proceso aki ta e reintegracion di personanan cu na e momentonan aki ta haya apoyo financiero di gobierno den comunidad, pero alavez cu cada un di e personanan aki sinti nan mes productivo pa e pais. Na momento cu un persona ta depende di bijstand e no ta riba tereno laboral, su contactonan social ta menos, pero na momento di por reincorpora un persona asina den e mercado laboral, e ta sinti su mes util back, parti di un organizacion y productivo pa su pais. Cu otro palabra, financieramente e ta productivo pa henter Aruba, e dignatario a remarca.

“Mas productividad pa Aruba, menos persona den bijstand, un persona mas motiva y cu ta sali di aislamento social tambe. Es decir, cu e proceso aki mester ta un ehemplo di ‘win, win, win” e dignatario a expresa.

Kiermen, un situacion di ganashi pa henter nos comunidad, e mandatario a acentua.

- Advertisement -

DUNA COMENTARIO

Please enter your comment!
Please enter your name here