Segun Evelyn Wever Croes: Dump di Sabanilla Abao ta un promesa politico
ORANJESTAD (AAN): Lider di Movimiento Electoral di Pueblo (MEP) Evelyn Wever Croes ta duna di conoce cu e dump di sta Cruz no ta un tema cu a papia riba dje, pero tin algun dia tabata trece e topico aki padilanti pa Serlimar tene cuanta di dje.
Segun Evelyn Wever Croes prome no tabata sigur kico lo bay sosode, pero despues cu a scucha un conferencia di prensa di director di serlimar unda cu a bira hopi cla cu gobierno ta trapa riba tur clase di ley y regla cu tin.
Tambe mas importante ta cu gobierno ta trapa riba e interes di e pueblo cu ta bienestar di e habitante di Sta Cruz pa asina talvez ta un promesa politico. Segun Lider di MEP e situacion cu tin na Sabanilla Abao ta mustra dos situacion. Segun Lider di partido MEP tin un tereno priva di E de Veer handelsmaatschapij NV cu gobierno ta bay uza.
E compania aki lo bay probecha financieramente di e deal y gobierno lo laga tira sushi den e dump pa asina tapa esaki y na momento cu e tereno ta full cera lo e duna e doño su tereno bek. Den e parti aki gobierno no a cana e caminda cu e mester a cana normalmente segun lider di MEP sra Evelyn Wever Croes. E pasonan cu tur hende mester tuma normal ta cu e doño di e tereno mester a pidi un hindervergunning cu no a wordo pidi.
Segun Wever Croes un hindervergunning ta permiti pa habitante nan expresa nan mes. Un otro ley cu e gobierno ta trapa ta e ruimtelijkverordering cu ta un ley cu e gobierno actual tin cu tene su mes na dje pero no ta haci esaki. Segun Sra Croes tin diferente interesnan mas. Si mester tuma bon nota e ta un caminda cu e turistanan lo frecuenta. Na momento cu e turista mester sali for di ayo rock formation y kier bay parke arikok ta via di e caminda aki unda cu gobierno kier pone un dump e turista mester pasa.
E parti aki tambe ta conoci door di agricultor nan. Segun Lider di MEP aki ta caminda cu Gobierno kier pone un dump pa Aruba. Tampoco no a haci un evaluacion ki efecto esaki lo por haci pa nos parke nacional Arikok. Segun sra Croes ta parce cu e gobierno actual ta trapa riba tur e reglanan cu tin y tambe riba nos propio estudio cu ta wordo haci.
E maneho di cero tolerancia cu tin cu e propio gobierno aki mes a bin cu ne ta pa nan por complace un persona. For di siman pasa a pidi serlimar na momento cu fraccion di MEP a compronde di nan plan ora cu kier habri e dump na Sabanilla abao pa wak esaki. Sinembargo e plan ta cla y ta determina pa sigui cu e trabao. Mesora fraccion di MEP a pidi un reunion publico den parlamento pa asina evalua e decisionnan cu a wordo tuma.
E reunion a wordo pidi cu urgencia debi cu a sinti e desesperacion cerca di e habitante cu ta biba den becindario, pero tambe e deadline cu tin cu ta awe prome di April. Mirando cu e dia ta cortico a manda 4 recordatorio pa presidente di parlamento pa por yama e reunion di dump mas pronto cu ta posibel. Fraccion di MEP a avisa serlimar pa nan warda te ora cu e reunion wordo trata den parlamento sinembargo nan no ta wardando. Lider di MEP ta duna di conoce cu lamentablemente no a ricibi ningun respuesta di presidente di parlamento.
