Home Editorial Editorial: MANIFESTACIONNAN NA ARUBA

Editorial: MANIFESTACIONNAN NA ARUBA

0
0
SHARE
- Advertisement -

                Di mi experiencia personal, y mi opinion sosteni for di tempo  di Betico (y applicable na dje tambe!) nunca mi a mira algun beneficio o resultado positivo pa nos isla den cualke protesta cayehero. Mi punto di bista semper tabata y ta keda basa riba e hecho cu caya no ta un subsituto pa mesa, unda cu  argumentonan solido y actitudnan firme por logra loke caya no por produci.

              Tin manifestacionnan pacifico cu ta sirbi pa enfatiza un discordia cu un partido den oposicion, o cualke grupo di comunidad por tin cu Gobierno, y semper cu e keda pacifico, sin consignanan ofensivo o insultonan personal, eseynan ta aceptable. Pero, nan ta hopi scars y casi no existente.

Simplemente pasobra e sicologia di masa no ta cana den e direccion ey, ya cu un grupo por produci mas balentia cu un individuo, y e sentimento di apoyo cu por resulta negativo pa paz publico y trankilidad di e ciudadanonan, ta bay perdi na momento cu e desborda, loke comunmente sa pasa. Lo contrario ta sosode na e paisnan pazuid di nos, unda violencia ta predomina den casi tur manifestacion, a pesar di e intencionnan pa keda dentro di parametronan pacifico, y kimamento di autonan o cualke otro material o propiedad di e mesun Pueblo ta sosode invariablemente, y durante cual morto y herido tambe ta cay. E ta un caracteristica di temperamento, unda prudencia y tolerancia ta keda factornan ausente.

           Esnan cu tin un opinion contrario por wel di keda cune, pasobra
nos ta biba den un democracia hopi permisible, hasta di iregularidadnan condenable. Mi postura a keda firme durante tur e añanan cu mi a practica periodismo, o sea mas di 40! Mi no ta bay bisa cu mi por ta ekiboca den esey, pasobra un declaracion asina lo ta hopi leu di e berdad. Mi ta sostene e punto di bista cu ta prefera, den tur confrontacion un mesa y no un caya pa discuti e asuntonan cu di nan mesun naturaleza ta permiti posturanan contradictorio, y puntonan di bista completamente opuesto. Y nos NO ta riba un mal caminda; tin progresonan visible cu ningun hende por nenga. Y cu recapacitacion di parti di Gobierno riba algun punto neuralgico cu di mes ta provoca reaccionnan contrario, nos por enfrenta futuro cu gran optimismo y confianza.

            Ta toca nos tur pensa bon kico nos ta bay haci pa resalta
nos puntonan di bista contrario riba asuntonan cu cual nos no ta
di acuerdo, y di su parti, Gobierno tambe mester tin e grandeza di demostra cu e por reconsidera, no solamente pa crea paz o bolbe na dje, sino pasobra e enfokenan treci padilanti tin mas sentido cu esnan cu Gobierno a sostene, tin biaha hasta caprichosamente.
Mike Eman a duna un tremendo demostracion di loke ta grandeza na final di e manifacion, ora cu, a pesar di e gritamento y palabranan cu por ser considera hasta ofensivo, el a duna e persona cu a entregue un manifiesto, un abrazo fraternal pa demostre cu e no tin ni ta keda cu algun rancor o resentimento. Esey ta Mike Eman den su miho momentonan como persona y como mandatario.

            Cu tin hopi problema pa resolve, prome y despues di e manifestacion, ta algo cu ningun hende por nenga. Nan tey, a la bista, y exigiendo coreccionnan inmediato pa aminora o elimina e daño cu nan por causa nos isla den e futuro inmediato. Ta duel mi cu nos tin un Ministro di Finanza completamente inepto pa maneha e cartera importante ey, y a cuminza pa corta den presupuestonan cu mester ta intocable. Esaki ta un problema adicional cu Mike mester resolve si e ta di trece trankilidad den sectornan importante di Aruba. Fuera di cu e tin un Ministro di Husticia completamente inutil, e tin awor uno di Finanza tambe, ademas di un pronkstuk visible y bunita, pero inefectivo.

              Por ultimo, permitimi haci referencia na algo cu mi a mira durante e manifestacion cu cual mi ta absolutamente den desacuerdo. Ta con MEP por a permiti cu patras di un cuadra grandi di Betico, algun marihuanero tabata cana cu blachinan di e mata di e droga ey comosifuera nan tabata exigi e legalizacion di dje y cu pa inferencia o presencia dilanti di nan blachinan odioso, Betico lo por tabata di acuerdo cu semehante barbaridad. Lubida! E no ta posible.
E integrantenan di MEP cu a acepta, o tolera, of a pretende di no a nota e contraste di e potret di Betico cu e blachinan di marihuana su tras, mester a exigi e marihuaneronan aleha di e gran lider Arubiano y bay cana hopi mas patras, pa no mancha e recuerdo di un di e figuranan mas importante y popular di tur tempo, y kende su memoria ami ta conserva cu e admiracion y respet mas halto posible.

- Advertisement -

DUNA COMENTARIO

Please enter your comment!
Please enter your name here