Home Politica No mester a tuma medidanan asina inhumano y pisa awor

No mester a tuma medidanan asina inhumano y pisa awor

0
0
SHARE
- Advertisement -

Si gobierno di AVP no a malgasta tanto

ORANJESTAD(AAN)–Segun un comunicado di MEP, no tin suficiente palabra pa describi e situacion financiero economico penoso y desastroso cu nos pais ta pasando aden na e momento aki. Un situacion tristo y deplorable cu a bin ta aumenta desde cu partido AVP a asumi gobernacion na final di 2009. Hecho ta cu durante e ultimo 4 añanan partido AVP den nan delirio di poder a masacra henter e structura y organisacion di nos pais, caminda por mira con den tur sector desaroyonan alarmante ta tumando lugar, e.o. den enseñansa, salubridad publico, husticia, social, labor y pa no papia mes di economia y finanzas publico.

E comunicado ta sigui menciona cu durante e ultimo 4 añanan e gobierno di AVP a malgasta placa di pagadornan di belasting den forma nunca bisto, e.o. na e tantisimo viahenan di placer di e ministernan y tur e placa di pueblo hinca den propaganda pa nan partido politico.

Tur sorto di contract y MOU a ser firma cu a costa y ta costando nos pais miyones y miyones di florin, e.o. e contractnan cu Wubbo Ockels, e team di futbol Sparta, Carbon War Room di Richard Branson, TNO, Rietveld Academie y e pago di huur na e edificionan di e dos institutonan Hulandes aki.

Deroche di placa di pueblo

Un gran cantidad di Green Conference a ser organisa, caminda te hasta a paga pa un solo orador,  un suma di mas cu 500 mil dollar. Alabes Gabinete Eman desde comienso caba a emplea entre 700 pa 900 coordinador y pensionado super bon paga pa traha rond di ministernan y di cual mayoria di nan no tin suficiente ekipahe intelectual. Ministernan di AVP kendenan den nan infancia no a yega di hunga cu trein y tram a yega na e idea di locura di bin cu un Tram y cual proyecto tin un costo di mas cu 60 miyon florin, pero cu awe tur comerciante ta sclama cu e tram no a trece ningun rendimento pa centro di ciudad. E gobierno di Mike Eman tambe ta bay den historia como e gobierno di klinker y asfalt cu no tin ningun clase di prioridad, ya cu den e casnan caminda dilanti klinker y asfalt a wordo basha, stoma di e muchanan indefenso ta ronca henter dia. Asina por sigui cu un lista largo di tur e malgastamento di placa di pueblo door di e ministernan di Gabinete Eman. Un gobierno cu no kier sigui conseho di instancianan internacional manera IMF, Standard & Poor’s y Fitch, awe ta para dilanti di e debacle di siglo di nos finanzas publico. Pero pa Mike Eman esaki no ta ningun problema, ya cu su filosofia di bida ta cu e financiamento di tur e locuranan aki por wel di sigui door di bay djis un tiki mas den rood. Un expresion iresponsable di un promer mandatario cu mester fungi como ehempel pa comunidad.

 

E cuenta final presenta

Sinembargo despues di tur fiestamento, deroche di placa y e debenan cu esaki ta trece cune ta sigui e episodio tragico cu placa a caba cu e gobernantenan aki. Y nan unico solucion te cu awor ta di hinca man den saco di pueblo pa paga tur e debenan aki. Den un grupito previlegia e gobernantenan aki a djodjo na nan antoho y awor cu e cuenta a ser presenta, nan kier pa henter comunidad paga e cuenta aki. E medidanan inhumano y cruel a cuminsa azota nos pais. Den e ultimo dianan aki, hendenan ta wordo kita for di trabao sin misericordia, mientras e peso di belasting cada dia ta birando peor. Prima di AOV a aumenta, edad di pensioen a bira 65 aña, prima di AZV lo aumenta dentro di poco, lo bin contribucion propio pa cuido medico y remedi, lo bay cobra pa piki sushi etc etc. Cu tur e medidanan aki pueblo su cartera finalmente ta keda blo bashi. Den henter e panorama tristo aki nos autonomia financiero a wordo traiciona tambe door di Mike Eman y su partido AVP, ya cu Hulanda a dicidi di pone e gobierno malo y iresponsabel aki bao curatela. Un berguensa cu henter nos comunidad mester carga y biba cune na e momento aki.

Pueblo cu ta sinti e engaño electoral di AVP ta sclamando cu nan no por mas y tur cos ta mustra cu Gabinete Mike Eman danki na e curatela imponi door di Hulanda lo no bay tene misericordia cu e pueblo y lo sigui corta te den weso di e mesun pueblo cu a pone nan den stoel di gobernacion, e comunicado di MEP ta termina cune.

- Advertisement -

DUNA COMENTARIO

Please enter your comment!
Please enter your name here