Home Politica Parlamentario Thijsen ta haci un yamada na tur ciudadano preocupa pa subi...

Parlamentario Thijsen ta haci un yamada na tur ciudadano preocupa pa subi caya Diabierna awor

0
0
SHARE
- Advertisement -

ORANJESTAD  (AAN): Diaranzon  mainta durante conferencia di prensa di MEP, Parlamentario Adi Thijsen a papia tocante e manifestacion cu ta bay tuma lugar riba 11 di April.

“E manifestacion ta Sali for di un grupo hopi preocupa y nos ta haya hopi yamada di hende tocante e manifestacion aki”, segun Thijsen.

Segun e parlamentario, ta sumamente importante pa ora cu pueblo ta preocupa y tin intrankilidad den comunidad, pa para keto y wak kico ta pasando.

MEP e ora ey ta evalua si ta sostene of no, e manifestacion.

“Nos ta un partido Social-Democrata y sigur sigur nos ta sostene e manifestacion di un pueblo cu ta biba den intrankilidad y den preocupacion, mirando e desaroya di nos comunidad riba tereno social-economico-financiero”.

Esaki segun Thijsen, kende a sigui bisa cu e pueblo kier un bida digno y no di luho.

Un bida digno kiermen cu mi kier e siguridad di un trabao, pa mi por gana mi pan dignamente pa mi cria mi famia.

E parlamentario a sigui bisa cu un bida digno kiermen cu  e hendenan tin un seguridad di entrada.

“Si mi no ta traha mas y tin un pensioen, mi kier ta sigur cu mi ta haya e pensioen ey tambe”.

“ Mi kier tin tambe e seguridad di un bon cuido y pa mi yiunan tin un bon educacion”.

Esaki segun Thijsen, kende a bisa tambe cu un bida digno ta ora cu bo por sali for di cas y sinti bo mes sigur.

“Ora mi yega cas bek, mi kier pa nan no a bay cu mi cosnan”, segun e parlamentario.

El a sigui bisa cu si bo wak e desaroyo di nos pais durante ultimo 5 añanan, por mira cu tin problemanan economico, problemanan social y cu tin hopi desempleo y criminalidad.

Pesey pueblo a dicidi cu awor nan ta bay marcha pa un bida digno.

“Nan ta bisa ta basta y den tur pais democratico ta yega un momento cu e pueblo ta mustra su sentimentonan y nos mester respeta esey”.

Esaki segun Thijsen, kende a indica cu e pueblo ta desapunta cu e medidanan cu a bin, pero ainda tin mas na caminda.

E pueblo no por cu mas medida y e ta fada di e abuso di poder, segun e parlamentario.

“Tin un cultura di miedo y hendenan tin miedo di perde nan trabao”.

“Nan tin miedo di bisa algo y esey ta cay bao di abuso di poder”, segun Thijsen, kende a sigui bisa cu e pueblo no kier tampoco mas manipulacion.

E ministernan ta hunga cu cifra, pa pone cos mustra mihor cu e ta.

El a duna un ehempel unda cu e ta bisa cu Minister Paul Croes ta trece dilanti cu desempleo a baha, siendo cu tur hende sa cu Valero a cera y Westin a manda hende cas.

Hopi tienda a cera y mas ta bay cera y asina mes e minister ta bisa cu tin menos desempleo.

Thijsen e bisa tambe cu finanzas di nos pais ta mas malo cu nunca y e presupuesto no a wordo entrega ainda.

Asina mes Gobierno ta bisa cu cos ta bon.

“Pueblo ta cansa, nan a bin cerca nos y nos ta sostene democracia”.

“Pesey ami y mi coleganan como representantenan di pueblo ta hasi un yamada na esnan cu ta preocupa y kier duna nan voz, pa subi caya Diabierna awor”, segun Thijsen.

- Advertisement -

DUNA COMENTARIO

Please enter your comment!
Please enter your name here