Gerick Croes (MEP)
ORANJESTAD (AAN): Ultimo simannan habitantenan preocupa di Pos chikito a vocifera nan malcontento cu WEB y su maneho negligente pa e salud di hende. E caso a haya atencion cu te hasta 2 anochi informativo a wordo yama door di nos compania nacional di utilidad WEB. Despues di e di 2 anochi WEB a compromete su mes cu lo continua cu e trabaonan necesario cu medidanan preventivo ehecuta na un manera responsabel.
WEB a disculpa su mes pero esaki no cai den bon tera serca e habitantenan. Mester remarca cu WEB a midi e nivel di asbest den aire dianan despues cu e chens cu asbest ya caba por a bai den aire.
Habitantenan tabata rabia riba e hecho cu nan no tabata responsabel pe posibel efectonan riba e salud di tur hende den e area. Habitantenan te cu dia di awe ta desapunta di e fayo flagrante aki y kier mira algo wordo hasi.
Loke habitantenan ta desea ta pa esnan concerni para responsabel pa nan salud door di e fayo cometi. Nos fraccion kier propone pa tur esnan cu ta habitante por wordo registra pa si encaso nan sinti sintoma y mester e cuido necesario den futuro. Tur habitante cu a wordo exponi na asbest y bira malo por wordo cubri door di un un fondo special cu por wordo usa pa paga gastonan medico envolvi. E fondo aki lo mester wordo regla pa asina por garantisa y mustra tambe cu tin compromiso cu e salud di nos hendenan.
Nos fraccion a base di preocupacionnan for di comienzo a hasi un peticion pa un “bijeenkomst” pero despues mirando e fayonanan pisa cu a ser cometi nos a dicidi di entrega un peticion pa un reunion publico cu e ministernan concerni. Esaki ta un tema pa bienestar general di e bario y mester su debido atencion y esnan envolvi mester wordo responsabilisa pa e eror aki.
Awor ta resulta cu e peliger di asbest ta reinando den mas area na Aruba. Ta conoci a base di informacion di WEB mes cu e trabounan riba e tuberianan aki ta tumando lugar caba pe ultimo 2-3 añanan. No ta Pos chikito so pero tambe Savaneta ta bou peliger di asbest cu aire contamina sin cu esaki ta bou control y sin cu ta tuma e accionnan necesario. Nos a ricibi tambe un yamada di un habitante di Savaneta cu tambe kier a raporta cu e actonan di WEB y otro partidonan envolvi no a bai bon ora ta trata di asbest. E habitante en cuestion tabata un persona cu a labora na Valero y ta conciente di e peliger di e particulanan di asbest ora cu esaki bula of ora bo drenta den contacto cune.
Diaranson ultimo nos a wordo hiba na e area ( bandi pazuid di veld La fama) unda cu por a constata cu e exposure di e material aki ta den un fase cu por ta ainda mas peligroso. Nos a haya fotonan pa asina nos por publica. Por mira cu WEB a cambia un tubo si pero e otro liña a wordo laga eynan den un estado deplorabel unda cu e particulanan di asbest ta visibel y por bula den biento. Esaki ta exigi accion di inmediato di esnan concerni.
E habitantenan di Savaneta cu posiblemente por resulta di ta afecta awor of den futuro tambe mester wordo registra y si ta posibel gastonan medico tambe mester wordo cubri door di un fondo special. Nos kier remarca cu e forma di traha aki sigur ta uno negligente y cu por pone hende su bida na riesgo. Nos fraccion ta pensa cu salud di hende bo no por hunga cune y mester ta halto riba e lista di prioridad. Nos ta spera cu e reunion publico por wordo yama mas pronto cu ta posibel pa trata problematicanan manera esaki cu ta di bienestar general.
