Un sistema eficiente y sigur
ORANJESTAD(AAN): Despues cu e Airbus 330-200 di KLM a yega Aruba riba e buelo mas largo riba bio-fuel, a sigui un ceremonia na aeropuerto pa celebra e hecho aki na unda a sigui varios discurso.
Entre otro di CEO y Presidente di KLM Camiel Eurlings, Prome Minister Eman, CEO di Schiphol Group Jos Nijhuis y CEO di Triple A sr. Peter Steinmetz. Discursonan cu ta indica e importancia di e relacion cu ta existi entre Aruba, KLM y Schiphol. Señora Annet Steenbergen a papia riba e sistema di biometria ‘Happy flow’ cu tabata instala na aeropuerto y punto pa punto a mustra con esaki ta funciona y con e ta facilita tur envolvi, e pasahero, e empleado, e aeropuerto y e companianan di aviacion.
Tambe e ta yuda den combati ilegalidad. Aruba ta trahando duro pa bira un ‘Hub’ entre Europa y Latino America y vice versa mescos tambe kier logra bin cu un pre-clereance pa e region di Schengen y ta aki ta unda un sistema biometrico ta apropia den facilita loke Aruba kier logra. Despues di su discurso cortico, pero masha ilustrativo, señora Steenbergen a invita sr.Eurlings pa cana e ‘happy flow’.
Pa esaki e mester a presenta su pasport solamente un biaha so. Por lo demas e por a sigui cana haciendo uso di e ‘face recognition’ cu e sistema aki ta maneha. E ruta ‘happy flow’ cu Eurlings a cana a bay lihe y sin problema.
Señora Steenbergen a splica cu loke tin na aeropuerto ta un ‘demo’. “Nos ta den e trayecto ainda di subasta. E planning ta cu pa na september of oktober nos por cuminsa cu instalacion di e sistema aki. Esaki si tur cos bay segun nos planning. Nos mester haci lihe, pasobra nos ta e prome na mundo cu ta bay introduci e sistema biometrico aki. Pero, nos ta worde literalmente persigui door di otro paisnan cu tambe ta trahando duro pa bin cu un sistema asina, manera New Zeeland y Arabia Saudita. Pero Aruba mester ta e prome, pesey nos tin hopi pura”.
Pre-clearance ta e siguiente paso, asina Steenbergen a splica. “E sistema aki ta un base importante pa tin. Nos ta den combersacion continuo cu den Haag y cu Brussel. Tin hopi stakeholders envolvi. Nos ta kere den un pre-clearance. E ta un paso cu Europa mester tuma. Merca tin’e hopi tempo caba. Nos no sa exactamente si e ta bira mescos cu esun Mericano. Nos ta hopi ainda den e proceso di preparacion”.
Steenbergen a bisa cu e grupo di trabao tin hopi partido importante na su banda. “Schiphol y KLM a compromete nan mes na e pre-clereance. Nan tin masha hopi bentaha mes cu ne. Mi ta keda ripiti y sigui ripiti, e sistema ta uno mas eficiente y mas sigur. Aeropuerto mester crece y mas pasahero mester bin via Aruba. E mashinnan no ta bay tuma e trabao over di hende y esaki no ta bay a costo di empleo. E proceso aki ta solamente bay mas lihe sin rijnan largo di hende ta warda. E mester ta lihe y sigur, y esaki ta loke e sistema aki ta brinda.”
