Home Editorial Editorial: E MANERA EKIBOCA!

Editorial: E MANERA EKIBOCA!

1
0
SHARE
- Advertisement -

            Mi no sa ken ta duna e orden, ni ki instruccion e ta agrega na esnan cu e ta manda haci control, pero manera cu el a ser haci siman pasa ta bay linea recta contra sentido comun. Durante e siman cu a pasa, por ehemplo, mas na final cu na comienzo, un set di hende, incluyendo varios polis a bay haci un control na diferente restaurant den e area dilanti di e hotelnan. E doñonan nobo di Benihana a yamami yen di furia pa protesta contra e manera cu e control a ser haci, o sea e momento cu a scoge pa hacie. Tabata net ora e restaurant tabata yen di turista, cu a spanta pa muri ora nan a mira un set di polis cana drenta e lugar pa haci control. Nan por a deduci o imagina cu e presencia di e autoridadnan uniforma por tabata tin algo di haber cu cualke tipo di negoshi ilegal y peligroso, y no un simple control di cushina y e manera cu cuminda ta ser procesa.

No tabata tin ningun otro hora pa hacie? Pakico perhudica e trankilidad di e turistanan na momento di haci cualke tipo di control? Ken ta responsable pa e tipo di medidanan aki? Mi no ta mira nada malo den cualke tipo di control, pasobra mi sa cu e ta necesario den hopi caso, pero pa fabor, midi e consecuencianan bon ora di determina e momento cu ta bay hacie, no solamente pasobra cierto horanan di hopi trafico di hende den un restaurant por causa un impacto negativo riba e turistanan, sino pasobra e ta perhudica tambe e tipo di negoshinan ey. Otro biaha, pensa prome cu actua, y djey actua cu prudencia pa no perhudica e pilar economico number un di Aruba. Ta e unico entrada di magnitud cu a keda nos despues cu e refineria a cera.

Mi no sa kico mas Gobierno por inventa pa irita hende, ya cu el a crea caba suficiente motibo pa atrae e rabia general di poblacion. Nos cu a nace na Playa apenas por reconoce loke a keda di nos ciudad despues cu tanto caya a ser habraca sin consideracion. Mi no sa con e genionan cu a bin cu e idea di cera Caya Grandi pa trafico a pasa por alto e hecho cu e tiendanan na tur dos banda di e arteria principal ey mester suministra nan mes cu mercancia pasobra e facilidad pa descarga truck o container simplemente no ta existi. Tur loke e responsable di e labornan ey por a logra ta pone un set di hero bieu cu no ta representa absolutamente nada reconocible. Si ta pa evita cu autonan ta para riba acera o cualke otro plataforma di cement, mi ta sigur cu cualke investigacion hasta superficial lo a produci diferente alternativa hopi mas atractivo cu e baranan bieu ey cu ta mik riba cielo sin por alcance o ricibi di dje un refleho agradable.

Nos tur ta cansa di tanto disparate. Trafico di mes a para bira un berdadero pesadiya, y tin cierto horanan di dia cu e ta agota cualke pasenshi, hasta esun di Job, si e por tabata bibo ainda den e epoca aki. Mi ta compronde cu Gobierno ta haci su best pa purba saca Aruba di e pos cu e ta aden prome cu e hoga di berdad, y mi tin confianza den e capacidad di nos hendenan pa bin cu ideanan, proposicionnan y recomendacionnan cu por haci un diferencia. Mi ta convenci, ademas, cu mester traha riba e creacion di un ambiente mas positivo posible, pasobra cu esun negativo cu ta existi actualmente e unico direccion cu nos por bay ta abao. Ya nos a yega caba e limitenan soportable. No a keda espacio pa mas frustracion.

Pero, pa haci esey, o sea crea un esfera di positivismo, tin mester di e cooperacion, o mas bien guia, di Gobierno, cu ta esun cu mester pone un fin na tanto medida cu ta afecta poblacion en general sin retribui e caha di Gobierno cu e fondonan necesario o rekeri, o cu por haci un berdadero diferencia entre entrada y salida di e fondonan di Gobierno.  Busca mas fondo sin para e gastamento desordena di Gobierno den proyectonan cu por, den futuro, bira algo yamatibo, ta parcemi e manera ekiboca di procede. E ta propio di mentenan perturba, cu no a siña razona segun e reglanan di pragmatismo, y ta sigui e preceptonan di kere den cualke vision birando lomba pa e realidad existente. Mi ta kere den resolve e problemanan di presente, y laga futuro resolve su propio dificultadnan, ora cu nan surgi o para bira un parti di dje.

- Advertisement -

DUNA COMENTARIO

Please enter your comment!
Please enter your name here