Home Editorial Editorial: UNDA PATRIOTISMO A KEDA?

Editorial: UNDA PATRIOTISMO A KEDA?

3
0
SHARE
- Advertisement -

            Nos a bira lomba pe, o nos a simplemente lubida riba dje? Mi no ta compronde pakico den e momentonan actual e figura di un berdadero patriota den e mundo politico ta asina scars. Ta pa falta di idealismo o interes sincero den e bienestar di nos isla? O lo ta pa e exceso di interes personal, sea pa propio glorificacion o pa un ego asina grandi cu no tin espacio pe den e pecho di cualke ser normal? Mi ta mira hopi potret saca cu diferente dignatario di otro paisnan, y pa no bay asina leu, mi ta mira nan saca na Aruba mes cu ken cu ta cu ta dispuesto di presta su mes pa sali riba un potret cu cualke mandatario o politico, pa mediocre cu e por ta. Den diferente departamento bo ta haya un of otro persona cu ta sinti su mes asina superior cu e no ta paga tino na loke su berdadero deber ta, o sea di sirbi su pais manera un patriota, y no un elemento cu kier duna su mes importancia interfiriendo cu proyectonan cu ta na fabor di nos isla, pero proponi pa e partido politico contrario na esun di dje. Enfin, con cu bo kier mire, y con cu bo kier analize, e carencia di berdadero patriotanan den e mundo ey ta evidente.

            Y pa logica bo mester por haya varios di nan den un Gobierno cu ta pretende di ta popular, o den un oposicion cu lidernan y candidatonan cu no ta destaca pa nan interesnan den e bienestar di nos Pueblo y nos isla, sino den un debate riba ki tema cu ta cu nan opositornan, con tal cu nan por luci momentaneamente cu briyo propio. Tur cos ta drey riba e manifestacion di importancia individual y no necesariamente di Aruba. Y lo peor ta cu nos a bin ta custumbra nos mes cu nan di tal forma cu nos a bira menos exigente, y menos critico di nan accionnan narcisista, menos demandante di un postura patriotico cu cual nos por identifica nos mes pa kere cu nos a entrega nos isla den mannan capaz di hibe padilanti, di lucha berdaderamente pe, di sacrifica loke sea di nan ego pa produci pa nos tur, como Pueblo, e progreso cu nos ta anhela.

            Esey ta  hiba nos pa e situacion actual di nos isla, unda e falta di placa ta pisa hopi den e actitud di Gobierno pa cu Pueblo. Mi no ta compronde cu, awor cu no tin e fondonan necesario, y ta tratando di aumenta e entradanan di Gobierno riba custia di Pueblo, a cuminza cu e caretera di cuatro canal entre Oranjestad y San Nicolas. Gobierno no ta haya cu e momento no ta esun mas ideal pa hacie? E no ta haya cu trafico ta move bon riba e caretera existente? Mi a nota cu e autonan mes, pa motibo di e cantidad cu ta trafica ida y buelta di San Nicolas ta controla velocidad y pasamento, y e trafico ta move cu normalidad. Loke mi kier bisa cu esaki ta cu mi no ta mira e urgencia di e proyecto ey.

            E hospital, en cambio, ta un necesidad cu mester a tuma lugar hopi tempo pasa. Si tabata tin razonamento aya riba, anto lo a evita di hinca tanto placa den un tram cu pa mi ta inutil, y lo a cumpra e aparatonan necesario y cu nos no tin, manera di radiacion, otronan mas moderno di radiografia, y un cantidad mas cu e placa lo a yega pa paga. Pero, pa monta un show tabata mas importante, aparentemente, cu cumpli cu e necesidadnan mas urgente pa e salud di Pueblo.

            Pa bise den poco palabra, mi no ta satisfecho cu e direccion cu Gobierno a pone pa nos isla. Nos no a gana nada cu spoor, tram, klinker y otro cosnan di luho cu a costa un fortuna y no ta bay produci nada back pa caha di Gobierno, solamente mas y mas gasto. Como factornan di show awor y den futuro nan por ta okay, pero como proyectonan valido pa yuda cura e malnan di finanzanan publico, nan no ta un contribuyente. Na lugar di yuda facilita e solucion, nan ta complike.

- Advertisement -

DUNA COMENTARIO

Please enter your comment!
Please enter your name here