Home Politica “Meneer de directeur” ta haci y deshaci, y empleadonan mester sufri

“Meneer de directeur” ta haci y deshaci, y empleadonan mester sufri

5
0
SHARE
- Advertisement -

Booshi Wever:

ORANJESTAD   (AAN):   Despues cu Serlimar a anuncia cu lo bai cobra 25 florin pa luna pa recohemento di sushi, aparentemente mester constata cu pueblo lo guli e medida aki tambe manda abow, siendo cu den campaña a fulmina contra Booshi Wever ora cu a propone pa cobra 10 florin pa benta sushi na Dump di Parkietenbos, Booshi Wever a expresa.

   Pero, “no hay mal que por bien no venga”, ya cu nos a cuminza haya hopi reaccion y informacion for di pueblo y tambe for di paden di Serlimar riba maniobranan cu e directeur ta kere di por permiti su mes.

   Nos kier a pone algun cos riba un rij pa mustra con e “meneer de directeur” aki ta “wheel & deal” contractnan pa su hendenan cerca, y tambe ta funciona na un manera hancho p’e mes, pero smal pa e trahadornan.

    Ta custumber cu ora un trahador kibra un auto, ta cobra esaki sin misericordia, siendo Serlimar ta paga un capitalazo na seguro. Pero ora cu “meneer de directeur” a kibra auto na dos (2) ocasion, e ora ey SI ta bai seguro y e “meneer de directeur” NO ta paga nada. Esaki a socede cu D-164 y cu un pick-up den cura di Serlimar. Dicon ora ta toka e trahador sí ta kite mesora for di su salario y di e “meneer de directeur”, cu un salario barbaro, NO ta kita ningun debchi.

   Y loke cu ta hasi e asunto mas straño ta e hecho cu “meneer de directeur” ta cobra “benzine-toelage”, y ta core ariba abou pa su cosnan personal, y pa ningun hende haya sa unda ela bai, ata ora cu “meneer de directeur” yega Serlimar su GPS-printout ta wordo “deleted”!!!

    Awor pa colmo dia 12 di mei un memo a sali cu medidanan drastico ta ser tuma riba e trahadornan y cu sancionnan pisa ta cai pa e homber chikito pa “meneer de directeur” sigui privilegia su mes y otronan cerca di dje. E medidanan, banda cu nan ta ridiculo, nan ta infantil tambe, nan ta e.o:

* cu si e belader constata cu e no por hiba e saco pasobra no ta “huisvuil” y e no hiba e saco of bari, y despues otro hende bin huzga cu SI e mester a hibe Serlimar, lo kita 15 minuut for di su salario.

* si surpasa e velocidad di 80km, lo cobra 25 florin pa cada biaha cu esaki socede. Esaki lo wordo controla via e sistema di GPS. Aki pa e humilde trahador Serlimar ta intransigente, pero pa e “meneer de directeur” ta “delete” esaki.

* si daño wordo hasi na un container y no por saca afo ken a causa e daño, e humilde trahador mester carga e cacho y e mester paga p’e.

* e “vuilwerkpremie” no ta wordo paga ora cu un trahador ta malo. Pero e “meneer de directeur” si por cobra su “benzine-toelage”, siendo e ta corre ariba abow cu D-164, hasiendo cosnan priva.

* ora di overtime lo paga solamente 4 ora na 150% en bez di 8 ora.

   Ta di spera cu sindicato y trahadornan para duro pa e abuso di poder aki di “meneer de directeur”, pasobra pa e trahadornan ta pasa machete, pero pa “SU HENDENAN” tin tur cos.

    Y nos kier ilustra algun asunto hopi “fishy” al respecto, nos tin mas ainda, pero eseynan nos ta warda pa despues:

1. Pa esun cu a yuda “meneer de directeur” haya e posicion di Directeur, esta Gaby Werleman, el a fix pa huur un casita cu nan ta paga 5000 florin pa luna pa 5 aña largo. Un cas cu a wordo cumpra pa 140.000 florin. Esey kiermeen cu den e 5 añanan ey, Gaby lo strika e suma barbaro di 300.000 florin. Segun informacion cu nos a haya, un fundacion a wordo lanta cu e meta pa “cover up” henter e fixmento aki, na unda al final Gaby Werleman lo probecha grandemente.

2. Lo bai cobra esnan cu ta paga pa luna 5 florin na administatiekosten, pues Juan Bimba lo bai paga 30 florin pa luna y esnan cu tin e manera di paga e suma den un solo tiro no mester paga nada extra, pues pa e riconan SI ta cobra 25 florin y e pober mester paga 30 florin. Y nos tin informacion cu no ta e departamento di administracion di Serlimar lo bai cobra esaki, NO, aparentemente un compania priva lo bai hasi esaki, di cua e doño supuestamente ta hopi cerca di “meneer de directeur”.

     Pa “meneer de directeur” y su hendenan por sigui biba lekker, e trahadornan y e pueblo mester ser castiga y “LOKE FALTA AINDA”!!”, Booshi Wever a finaliza bisando.

 

- Advertisement -

DUNA COMENTARIO

Please enter your comment!
Please enter your name here