Home General Prome Minister Mike Eman tabatin un amistad profundo cu Wubbo Ockels

Prome Minister Mike Eman tabatin un amistad profundo cu Wubbo Ockels

3
0
SHARE
- Advertisement -

“Mi lo recorde como un gran amigo, un inspirador y un lider pa un miho calidad di bida pa humanidad”

ORANJESTAD(AAN): Fayecimento di Prof.dr. Wubbo Ockels tabatin un impacto grandi na hopi parti di mundo. Na Merca unda e tabata bon conoci, na Hulanda, su pais natal y sigur tambe na Aruba. E isla cu a adopta Ockels y cu el a stima. E prome astronauta Hulandes Wubbo Ockels a enfrenta hopi reto den su bida.

E ultimo reto el a hib’e cu dignidad, pero tambe cu un perseverancia grandi. Aunke cu Ockels no kier a entrega spada y a bringa e lucha inigual cu tur fervor cu e tabatin den dje, diadomingo dia 18 di mei 2014 nos Creador a yam’e cerca dje.

Mundo a perde un di su miho aliadonan den su lucha pa durabilidad. Su mensahe na cada un di nos pa percura pa un miho mundo, no mag di bay perdi. Si no, su lucha tabata envano.

Esey nunca por ta e intencion di su inmenso dedicacion, su trabou incansabel, su inspiracion abrumador y su lucha tenaz pa logra un miho mundo. Prome cu Prome Minister Eman a aborda avion pa bay riba un biahe di trabou pa Sint Maarten el a duna un declaracion riba fayecimento di su amigo Wubbo Ockels.

“Diadomingo mainta mi a haya e noticia conmovedor di sra. Ockels cu su casa a fayece. Algun aña pasa nos a siña conoce sr.Ockels di hopi cerca. Un persona cu no solamente na Hulanda, pero den mundo henter a capta hopi atencion pa su dedicacion na trece realidad di e cambionan di nos clima y kico tur e cambio aki por conduci na dje, tambe na bienestar di humanidad. Pa trece esaki mas na conocimento di henter mundo. El a dedica hopi atencion tambe na pone instituto y gobiernonan al tanto di e trabounan cu tin cu haci.”

“E mensahenan aki cu sr.Ockels a manda den mundo y tambe su esfuersonan haci riba diferente plataforma a capta nos atencion y algun aña pasa mi a aserk’e, e tempo ey como Profesor na TU Delft y a invite pa bin duna un lectura durante nos prome Green Conference. E momento cu sr.Ockels a papia na nos Green Conference el a capta atencion di tur presente y un silencio grandi a cay den e sala ora cu el a describi cua tabata e momento den su bida cu el a dicidi cu pa semper lo e dedica su mes na e meta pa cuida nos planeta. Den un forma conmovedor sr. Ockels a splica cu na momento cu e tabata den espacio pa prome bes den e cercania impresionante di luna y streanan, el a bisa di a keda con mirando pafo el a mira nos planeta asina bunita y briyante, pero na mes momento asina vulnerabel. Como profesor den ciencia avansa e tabata sa cu rond di e planeta bunita ey tin un capa fini cu ta separa nos di e rayonan sumanente dañino pa humanidad y pa e clima. E rayo di proteccion fini ta bou di menasa di desaroyonan di emision di CO2 den nos orbita.” Eman a bisa cu sr.Ockels a gara nos atencion cu e analisis ey di su compromiso.

“Desde e momento ey nos a cera un pacto pa hunto haci un trabou grandi pa tambe na Aruba hiba e mensahe con nos por scapa nos planeta y crea un miho calidad di bida pa tur ciudadano. For di eynan a crece un amistad grandi y profundo entre nos dos. Sr.Ockels a bin Aruba cu su bapor Ecolution y a comparti cu nos studiantenan su testimonio y su vision.” Eman a splica cu algo mas cu un aña pasa a constata e malesa cancer cerca sr.Ockels. “Nos a comparti e noticia aki y nos a convivi cu ne. Mescos cu el a lucha cu nos pa haci cambionan importante na Aruba, nos a lucha cu ne den e ultimo lunanan dificil di su bida, pero semper cu e mesun amor y dedicacion. Aruba lo keda record’e semper. Ami sigur lo keda record’e como un gran amigo, un inspirador y un lider pa un miho calidad di bida pa humanidad. Nos ta spera cu nos Creador tum’e den su Reino y duna su famia forsa den e dianan aki.

- Advertisement -

DUNA COMENTARIO

Please enter your comment!
Please enter your name here