Home General Angelo Davelaar (SPA) ta lamenta e forma cu politiconan y prensa ta...

Angelo Davelaar (SPA) ta lamenta e forma cu politiconan y prensa ta creando un guera entre ciudadano

0
0
SHARE
- Advertisement -

ORANJESTAD  (AAN): No ta e presidente di sindicato a dicidi, nan a consulta cu nan “achterban” y ta e miembronan di sindicato a dicidi si ta acepta e protocol of no. Angelo Davelaar di sindicato di polis a expresa esaki diahuebs atardi den un conferencia, unda cu representantenan di e sindicatonan cu a firma e protocol a papia cu prensa.

E sindicalista a splica cu nan a yama e conferencia como resultado di tur e atakenan cu nan ta ricibiendo como esunnan cu a firma e protocol cu gobierno pa cu pago di e inhaalmanoeuvre, edad di pensioen, etc. siman pasa.

“Ta crea un impresion cu bringa pa bo derecho awendia ta algo malo,” Davelaar a subraya. El a splica cu e placa cu e ambtenaarnan lo ta ricibiendo, contrario na loke ta wordo bisa pa politiconan y hasta algun miembro di prensa, no ta un bonus. Un bonus ta un regalo y e primanan cu e ambtenaarnan ta ricibi ta algo cu nan a traha p’e, e inhaalmanoeuvre ta algo cu gobierno a keda debe nan pa hopi aña.

Davelaar a bisa cu ta increibel con politiconan y prensa ta creando un guerra entre ciudadano, entre e ambtenaar y e persona cu ta traha den sector priva. E ta splica cu aunke nan ta purba bisa cu nan no kier crea un desigualdad, nan ta tira piedra sconde man uzando palabranan manera “back-to-school bonus” (un regalo) enbez di “reparatiepremie” (pago di un debe bieu) y asina ta causa problema toch.

Angelo Davelaar ta lamenta cu e cosnan aki ta pasando, ainda mas cu tin otro sindicato cu no a firma sosten pa e protocol y aunke nan ta representa empleadonan publico ta expresando nan mes contra e protocol.

E cuater sindicatonan cu a firma e protocol ta SEPPA, SPA, SADA y SIMAR. Den e caso aki no ta e presidentenan a dicidi, pero e miembronan a bisa cu nan ta di acuerdo pa nan representantenan firma den nan nomber.

Davelaar a subraya cu e otro sindicatonan ta purba di “kleineer” esunan cu si a firma den tur sorto di manera. El a menciona cu hasta a uza e palabra “traidor” contra nan y a acusa esunan cu a firma di ta favorece y sostene un of otro partido politico. E presidente di SPA a nenga categoricamente e acusacion cu e sindicalistanan cu a firma e protocol, pero particularmente e mes, di a laga politica influencia e acuerdo, bisando cu como sindicalista e ta neutral y ta haci su miho esfuerso pa negocia pa su miembronan y ta actua den nan nomber.

- Advertisement -

DUNA COMENTARIO

Please enter your comment!
Please enter your name here