Home Editorial Editorial: ALGUN DUANERO NA AEROPUERTO

Editorial: ALGUN DUANERO NA AEROPUERTO

1
0
SHARE
- Advertisement -

            Parce cu unda cu tin un relacion, aunke remoto, cu e Ministro di Finanza, cosnan ta bruha y alevosia ta reemplaza educacion. Te unda cu mi sa, ta e ta e hefe maximo di Duana. Na aeropuerto a bin un cambio drastico den e actitud cu algun persona uniforma como duanero ta aplicando na e Arubianonan cu ta bay exterior y ta bin back cu algun cos cu nan a cumpra pa nan mes. Asina nos a mira e caso di un DJ cu a pasa cu 6 maleta sin cu nan a sikiera pasa nan den e mashin cu ta controla e interior di nan; en cambio un dama cu a bin cu dos jeans cu el a cumpra na Miami, y cu el a usa tambe, pasobra e no a adkiri nan pa bende, sino pa su uso personal, y kico e muher duanero a haci? El a hole e crotch pa ta sigur cu nan no ta nobo, y djey el a bisa e dama cu ni maske el a usa nan un biaha, e mester paga derecho di importacion riba nan tog! Den e dos casonan aki mi kier a ilustra e nivel cu e actitud di algun di nan na aeropuerto a alcanza, especialmente cu Arubianonan. Tin hopi mas keho, pero mi ta kere cu e dos casonan aki ta ilustra e trato preferencial y hasta por bisa discriminatorio cu ta ser aplica pa algun duanero na aeropuerto, especialmente di parti di e muhernan bisti cu e uniform di e cuerpo ey.

            Tin tambe e caso mas receinte di un avion yen di hende cu a bin di Hulanda, y TUR a pasa sin e molester di e uniformadonan. Awor, ningun hende ta cuestiona e autoridad cu nan tin pa eherce e control necesario pa detecta mercancia cu por bin di contrabando, o substancianan nocivo y ilegal cu por ta presente den cualke maleta di un sospechoso, pero si ta di aplica e regla riguroso di control y revision, anto hacie pa tur hende, sin excepcion. No ta mi custumbra di bay publico cu loke mi a presencia personalmente na aeropuerto, y ni tampoco mi kier interferi cu e labornan cu e controladornan di aduana ta haci, pero ora mi observa intervencionnan preferencial, y hasta persecucionnan di tal o cual pasahero Arubiano, mi mester lanta mi voz di protesta. E no ta bon. E no ta ilustra e respet cu mester existi pa esnan cu ta cumpli cu nan trabao y ta eherce cu consideracion y respet pa e pasaheronan.

            E duaneronan mester splica tur e pasaheronan cu ta haci uso di nan vacacion pa bay den exterior, y tambe henter poblacion Arubiano, cu cada pasahero tin derecho riba tal cantidad di dolar cu e por gasta cumprando cosnan pa su mes, y cu no tin mester di declara ni paga derecho riba nan. Nan mester splica tambe, si acaso ta asina, cu ni paña usa (aunke nan ta cumpra den exterior) por pasa sin paga derecho, manera e muher duanero a bisa un pasahero femenino. E editorial aki no tin nada di haber cu e cuerpo di Duana mes, cu semper mi a respeta y a respalda ora tabata necesario contra cualke abuso o negligencia di nan derechonan. Aruba ta bon sirbi cu e cuerpo ey y ta un lastima cu mi ta hayami obliga di menciona sikiera e casonan anterior cu den mi opinion no ta papia bon di un par di nan cu ta eherciendo nan labornan na aeropuerto cu cierto alevosia.

            Pa haya respet bo mester mustra respet, sin importa cu bo ta den uniform of un simple franel casual. E trato cu otronan di parti di autoridadnan mester ta firme, pero no ofensivo ni grosero. Asina ta evita hopi confrontacion innecesario ora di eherce funcionnan publico. Na aeropuerto lo ideal ta trata tur pasahero cu e mesun cortesia, cu no kier meen menos firmeza o autoridad, sino cumpliendo cu debernan di revision di ekipahe sin e necesidad di exhibi autoridad extremo y hasta incorecto, comosifuera e ta un parti di e uniform cu bo tin bisti, y cu ningun hende por cuestiona. Corda cu lo cortes nunca ta kita di lo balente!

- Advertisement -

DUNA COMENTARIO

Please enter your comment!
Please enter your name here