Home Editorial Editorial: E MUHER LOCO CU KIER KIMA ARUBA!

Editorial: E MUHER LOCO CU KIER KIMA ARUBA!

1
0
SHARE
- Advertisement -

     Ta ki clase di “defensor” di derechonan humano Edwina Henriquez ta? Ta den un mente defectuoso so e idea horendo di kima Aruba por a haya acogida. Ta con e, cu ta carga un titulo asina importante manera e “defensor di Derechonan Humano” por a expresa un deseo cu den prome lugar ta atenta contra tur e derechonan humano di e ciudadanonan di Aruba? Acaso e no a pensa sikiera, den su odio ciego contra Mike Eman, cu loke e kier mira sosode ta bay linea recta contra e derechonan humano di nos poblacion? Ta kico e ta kere cu lo pasa si en berdad algun amargado dicidi di ehecuta un plan asina desastroso pa nos isla? Ta nan ta bay keda sin trabao, ta nan ta bay sufri e consecuencianan di un acto asina iresponsable; ta nan ta bay cay den e miseria di un isla sin produccion, sin e capacidad di sostente su propio poblacion riba un nivel acceptable.


         Biaha pasa e tabata tine contra mi, pero ni no sa haci caso di hendenan cu ta sufri di trastorno mental. Mi a lague pa su cuenta ora el a yamami pa stranhero y cu mi mester bay di e lugar aki, y un tou di otro disparatenan incredible. E no sa cu mi tin den mi poder telegramnan cu Betico a mandami felicitando mi como un “gran Arubiano”? Dia mi a nace aki, na Oranjestad, mi ta sigur cu Edwina no usa ainda su prome buki. Pero awor su guera ta contra Mike Eman, un berdadero cabayero y e miho Prome Ministro cu ami a yega di presencia na Aruba. Di cu el a comete algun eror? Esey ta sin duda.
      
        Pero ken no a comete nan? Mike por a bruha den algun prioridad, pero el a demostra cu e tin un vision pa mehora nos isla, y el a pone man na obra. Di cu algun di e cosnan cu el a pensa mester a bin prome a resulta ekiboca, no tin duda. Pero e no ta un motibo pa desea, a base di un odio implacable di Edwina, pa nan kima Aruba pa e mire desaparece como Prome MInistro. E ta un deseo enfermizo cu a nace di un mente hopi perturba, y cu no ta stima su mesun isla, apesar cu e ta referi na su mes cu un ego mas grandi cu su cerebro cu e ta un “defensor” di derechonan humano! Ta kico el a defende te awor na Aruba? MI no conoce ningun di e resultadonan di su intervencionnan como “defensor”.

         Si e kier haci su mes un fabor grandi, y di paso contribui na algo positivo pa su isla, e stop cu e coy loco ey di “defensor” y cuminza protege e derechonan humano di e marginadonan Arubiano cu cosnan pragmatico y lograble. Pero si e sigui dal gritonan den bashi, purba ofende ken cu e kier, y sigui desea e locura di kima Aruba, mi ta kere cu e unico destino cu ta kede ta un cel den caulke manicomio cu kier core e riesgo di tin semehante loco entre su ocupantenan.

         Awor, mi ta hopi curioso pa sa si MEP ta bay distancia su mes di e desvarionan di Edwina, pasobra nan actitud den e caso aki lo bisami claramente kico nan tambe ta pensa, y te con leu nan odio o nan ambicionnan politico ta yega. Mi no por kere cu MEP por ta contento cu expresionnan cu ta desea e destruccion di nos isla, den ki forma cu ta. Si mi no mira ningun reaccion categorico di e partido geel, mi ta asumi cu nan lo ta di acuerdo, y e paginanan di DIARIO lo no ta na nan disposicion mas.      Pasobra ami no ta kere den propaga ideanan malsano pa Aruba door di ningun hende y ningun partido, y menos ainda proveniente di un muher loco di berdad. Mi a lucha hopi duro banda di Betico den e cuestion di Status Aparte pa mi sinta braza cruza y laga un trastornado dicta cosnan maligno na un partido den cual mi a milita durante hopi aña. Gobiernonan ta subi y baha a base di e voto di e mayoria di Pueblo, no a base di actonan destructivo, no a base di violencia, no a base di kimamento.

- Advertisement -

DUNA COMENTARIO

Please enter your comment!
Please enter your name here