Home General Mervin Wyatt-Ras a elabora encuanto e rapport di Unicef titula “De situatie...

Mervin Wyatt-Ras a elabora encuanto e rapport di Unicef titula “De situatie van kinderen en jongeren op Aruba”

3
0
SHARE
- Advertisement -

Den conferencia di prensa

ORANJESTAD   (AAN):  Durante conferencia di prensa Parlamentario Mervin Wyatt-Ras a trese padilanti cu durante reunionnan di Interparlementair Overleg Koninkrijksrelaties (IPKO) lo discuti encuanto di e rapport di Unicef titula “De situatie van kinderen en jongeren op Aruba”. E topico di hubentud y hobennan ya caba ta punto di agenda durante reunionnan interparlamentario.

A traha un rapport entre otro basa ariba un investigacion cu a ser haci na Aruba dor di sra. van der Wal. Alavez na Aruba gobierno a organisa un reunion di Reino durante cual a trata hubentud y hobennan, enseñanza y economia duradero.

E rapport di Unicef a ser trata a base di tratadonan internacional pa loke ta trata derechonan di mucha.

Na anja 2011-2012 Observatorio Social del Ecuador (OSE) a haci un analis di e situacion di mucha y hoben na Aruba y a yega na diferente recomendacionnan cu por ser encontra den e raport.

En general a recomenda maneho integral y cu tin introduci cierto leynan pa cu hubentud. Ta rekeri alavez consulta di gobierno cu organisacionnan, sindicato y sector priva pa por implementa maneho.

En specifico a ser menciona diferente area di derecho di mucha cu tin cu bin cierto cambio, esta derecho ariba salubridad, derecho ariba ensenjanza, derecho ariba proteccion y derecho ariba participacion.

-Pa loke ta trata derecho ariba salubridad por bisa cu nos tin AZV bon regla pa grandi y chikito, e cifra di mortalidad infantil a baha den curso di anjanan, 9 di cada 10 mucha ta haya nan vacuna entre 12 -20 luna y nos pais por conta cu awa di bebe limpi.

Retonan cu tin ta entre otro sobrepeso di 35 % di nos muchanan di skol basico y e hecho cu e cifra di embarazo hubenil no ta baha apesar di accionnan preventivo. Aki ta recomenda deporte pa nos muchanan y movecion, stimula cu babynan ta bebe lechi materno y educacion sexual como parti di curriculum na tur skol.

-Pa loke ta trata nos ensenjanza por a tuma nota cu ensenjanza ta forma 6.7 % di nos Producto Bruto Nacional, locual ta positivo, tin 80 skol, 7  asociacion di skol.  Un cantidad di 22.000 mucha, 99%, ta bishita skol basico, desde 2011 nos tin un ensenjanza obligatorio, tin atencion pa muchanan di otro idioma den Prisma, 7 di 10 mucha ta sigui skol avanza despues di finalisa nan skol basico, e grupo di mucha hombernan cu ta sigui ensenjanza di nivel mas abou ta 59 %, mientras mucha muhernan ta e grupo di mas grandi, esta 58%, cu ta sigui ensenjanza ariba un nivel mas halto manera HAVO. Di e cantidad di teenagers 10% no ta bai skol. Tin cu tene cuenta cu 75% di nos poblacion laboral tin un nivel di educacion abou. Ademas nos ensenjanza ta ser experencia como autoritario klassikaal y cu tin gruponan cu limitacion cu no tin ensenanza special adecua pa nan.

Como puntonan cu lo traha na dje ta fortifica e sistema di ensenjanza cu atencion pa e mucha su desaroyo specifico, integracion di e mucha special den ensenjanza, control di calidad di ensenjanza y acohida despues di skol tambe pa hubentud di 12 anja pariba y un di dos chens pa hobennan cu no caba skol.

-Pa loke ta trata e derecho ariba proteccion por bisa cu segun cifras di Telefon pa Hubentud 1 di cada 10 mucha cu yama ta pa motibo di abuso, maltrato y negligencia. Buro Sostene Mi a raporta na anja 2012 y comienso di 2013 cantidad di 309 di caso di descuido, maltrato, violencia, abuso sexual. Aki ta necesario prevencion y fortificacion di e rol di buro Sostene Mi cu ta resorta bao di Departamento pa Asuntonan Social pa coordina ayudo na victima. Ta necesario pa haci violencia y abuso di mucha visible y cu mayornan mester haya mas sosten. Proyecto manera e Tienda di Educacion, Fundacion pa Nos Muchanan, Witgele Kruis cu e proyecto di Stevige Ouderschap, I love my body y paga Tino ta hopi importante preventivo. Alavez e ley di Centronan di mucha mester ser actualisa y implementa.

-Pa loke ta trata participacion por menciona e hecho cu Aruba tin un Parlamento Hubenil como un logro importante. Ta necesario pa nos stimula conseho estudiantil y pa stimula hobennan yiu di migrante pa preveni cu nan ta cai den circulo negativo. Minister lo bai skucha hobennan opinion y lo traha un notitie “Generation of Leaders”

Diferente ministerionan tin cu traha hunto pa por implementa e recomendacionnan y ta necesario cooperacion entre diferente instancianan tanto gubernamental como non-gubernamental pa logra metanan, segun Wyatt-Ras.

- Advertisement -

DUNA COMENTARIO

Please enter your comment!
Please enter your name here