Home Politica Accion di Prome Minister Mike Eman ta motiva pa su logica y...

Accion di Prome Minister Mike Eman ta motiva pa su logica y pasion

2
0
SHARE
- Advertisement -

ORANJESTAD(AAN): Hopi por cuestiona su accion, sin embargo loke no por tin duda riba dje ta e dedicacion y determinacion cu nos Minister President Mike Eman tin pa su isla.

Ta e mesun pasion y conviccion cu el a bin ta traha cune, te hasta prome cu su entrada den politica; un amor incondicional pa su pais cu ta inculca den dje for di mucha caba, ta haci di Mike Eman e hende cu e ta. E diferencia ta cu for di momento cu el a bira Parlamentario y consecuentemente Prome Minister, Mike Eman a hiba un trayectoria exitoso pa medio di su inteligencia, diplomacia y respet. Esey ta funciona tanten cu e ta bin di ambos banda.

Lamentablemente, durante ultimo tempo Gobierno di Den Haag no a debolbe e bon boluntad pa traha hunto y hunto bay dilanti. Reconociendo cu e circumstancianan cu Gabinete Rutte kier pone Aruba aden ta innecesario, inhusto y anticonstitucional, Premier Eman a hay’e obliga di pone negociacion y diplomacia un banda pa duna un reaccion cu no ta laga duda cu e por pone su pia abou tambe si ta trata pa defende e autonomia di nos isla.

Temponan drastico ta rekeri medidanan drastico y nos Prome Minister Mike Eman a asumi su responsabilidad como lider di nos pais ora el a ripara e intencion di Hulanda. Prome cu a yega na e punto aki, ta lunanan di intercambio a transcuri caminda na mas cu un ocasion Gabinete Mike Eman I y II a laga sa bon cla na Gobierno Hulandes, cu no lo acepta metemento, ni lo entrega autonomia. E welga di hamber inicia door di Premier Mike Eman ta un señal cla y raspa cu no tin espacio pa entrega di autonomia, pasobra simplemente Aruba no ta na benta.

Simpel bisa: Nos por haci cosnan hunto, pero no bruha pasobra Aruba no ta y no lo bira un colonia Hulandes nunca mas. Mientras tanto Prome Minister ta drenta awe su di tres dia di welga di hamber. E ta hayando e sosten grandi y constante di e pueblo cu personalmente ta bin cumind’e, felicit’e y compañ’e for di e camp improvisa dilanti di Gabinete di Gobernador.

Cada cuater ora, personal di Ambulans ta check e signonan vital di Prome Minister Eman pa controla su salud. Diadomingo merdia a constata cu e nivel di kalium a baha, y aunke dokter a conseha Premier Eman pa bay hospital pa check su sanger, esaki a nenga di bandona su lucha. Loke hopi ta haci chansa cune riba rednan social, ta un realidad pa nos Prome Minister; el a baha cinco kilo te cu ayera merdia. E accion di protesta contra Hulanda di parti di Prome Minister Mike Eman sigur ta algo poco convencional, pero nos mandatario semper tabata un lider poco convencional.

Pesey mes, e atencion cu ta ricibiendo di prensa internacional, tabata di spera. Medionan di comunicacion Hulandes ya cubriendo e desaroyonan di e welga di hamber. ANP, NOS, Algemeen Dagblad, Volkskrant y De Telegraaf ta reportando riba esaki. Associated Press y Noticias Caracol tambe a publica articulo y reportahe.

 

 

- Advertisement -

DUNA COMENTARIO

Please enter your comment!
Please enter your name here