ORANJESTAD(AAN): Polis a tene un Razzia Grandi den ex Westin Aruba Resort.
Polis y Guarda Nos Costa a haci control riba mas cu 350 trahador. Tabata buscando ilegalnan na pia di trabao. Diferente unidad di Polis a reforza Guarda Nos Costa den a accion aki. A drenta diferente area y asina pone man riba tur esnan trahando.
No ta tur tabata ilegal pero a haya si varios indocumenta cu no tabata descarta cu nan lo tabata ilegal desde prome instante. A controla tur hende pa documento.
Esnan cu cedula, nacionalidad hulandes y permiso valido por a bay mesora. Tabata tin te hasta Arubianonan cu mester a pasa den e control general aki y nan a bay cas mesora.
Otronan a bay warda cu transporte di CEA cu tabata tin tres van transportando e cantidad di indocumenta. Pa basta tempo a tende cu tin ilegalnan trahando y el a bira manera un discusion den pueblo. Mientras cu a tende politiconan expresa esaki, tabata tin tambe yiunan di tera cu a busca trabao eynan pero no tabata haya.
Cumpradornan di Westin a nenga na diferente ocasion cu nan tabata emplea ilegal. Nan tabata usa sub contratistanan pa haya e trabao haci cu e personal den construccion. E proceso di screening parce no tabata den nan man. Asina mes e resultado tabata cu casi 100 indocumenta a worde hiba warda pa un extra control. Di e cantidad aki sigur un 32 tabata 100% ilegal. Durante control a mira cu hopi di esnan cu tog a worde laga den libertad tabata tin permiso di turista, permiso di otro lugar pa traha y te hasta tabata mal usa e permiso di cria di cas pa traha den construccion.
Esnan cu tabata tin cierto papel tog cu status legal di estadia na Aruba pero trahando ilegalmente na Westin mester meld nan mes dialuna mainta na Guarda Nos Costa. E nacionalidadnan cu a keda deteni durante e proceso di razzia tabata Peruano, Mexicano, hopi Dominicano, Colombiano, Venezolano, Nicaraguense y tambe Spaño. Loke a haci falta segun autoridadnan cu a tene e accion tabata esnan di departamento di labor pa asina atende cu cada detenido. Aki a haya mas detaye di unda nan a worde emplea y con nan ta worde paga etc. Pero door cu tabata diasabra kizas esaki por tabata un estorbo pa nan tey. E cantidad di personal riba pia diasabra mainta pa e accion aki tabata riba 80. Tabata tin 20 personal di Guarda Nos Costa cu tabata den e accion di cual 12 na elugar pa controla documento y otronan cu mester a bay standby na warda pa ricibi e grupo indocumenta cu tabata worde transporta pa esnan di CEA cu nan busnan yen cada biaha. Guarda Nos Costa so no por a haci e accion aki mirando e cantidad di personal cu nan tin. Pesey mes a hacie hunto cu polisnan cu tabata presente reforzando buskeda den e hotel y rondona pafor di e hotel. A haya e master key tambe y a drenta camber pa camber di piso pa piso pa evita cu un of otro persona ta scapa e control riba documentonan. En total tabata presente sigur esnan di CEA, Guarda Nos Costa, Riot Team di Polis, Strand Politie, Unidadnan di K-9 y hefenan di Polis cu tabata lidera e accion. Awor cu e detencion di 32 personal 100% ilegal por confirma cu ta un accion exitoso pero no ta 150 ilegal manera ta scuchando regularmente den pueblo entre otro cerca cierto politico.
