Home Editorial Editorial: UN BRUHAMENTO FORMAL

Editorial: UN BRUHAMENTO FORMAL

1
0
SHARE
- Advertisement -

            Den tur e bruhamento cu a surgi entorno e firmamento di parti di Gobernador  di e presupuesto, un cos sigur a sali na cla: ni Hulanda ni Aruba tin e deseo di daña e relacionnan excelente cu ta existi entre e dos miembronan aki di Reino. Di cu Gobernador a tuma un decision, esey ta core pa su cuenta, pero di otro banda, pa e ser acusa di a comete un abuso di poder ta insolito, fuera di lugar y completamente censurable. No tin ningun base pa sostene un acusacion asina pasobra e decision cu el a tuma el a considera como parti di su competencia di acuerdo cu un articulo cu e ta cita for di e Constitucion vigente.

            Mi ta haya cu Prome Ministro Mike Eman a actua cu hopi prudencia y sabiduria, evitando cualke confrontacion cu e Gobierno di Hulanda, y alavez a haci e maximo esfuerzo posible pa mantene e autonomia di Aruba intacto. El a bay di acuerdo pa sali di e impase aceptando o co-proponiendo un estudio imparcial den loke sea cu e presupuesto por a causa den e mente di e tumadornan di decision envolvi.  Gobernador Refunjol a nenga di firma y e impresion tabata cu el a hacie bao e mandato di Hulanda, pero esaki a nenga cu nan lo a dune cualke instruccion al respecto. Awor mester spera e resultado di e tarea ey pa determina si tin base pa Gobernador nenga di firma e presupuesto, aunke algun experto na Hulanda ta bisa cu e no tin e tipo di competencia ey.

            Mientras tanto, tur hende ta dunando nan opinion tocante e materia, y politica partidista no por a perde e ocasion di haci su entrada y purba bruha tera un poco mas. Sinembargo, e asunto ta den via di solucion caba pa medio di un estudio imparcial cu na final lo determina e motibo(nan) pa cual Gobernador probablemente lo a nenga di firma, aunke e presupuesto a ser aproba caba den Parlamento.

            Den momentonan di crisis asina, bo por midi e caracter, e firmeza y e prudencia di e politiconan o mandatarionan envolvi. Den esey mester duna Mike Eman un bon puntuacion basa riba su postura na fabor di su isla. Pa basta tempo caba nos tin e impresion cu Hulanda ta tratando di  asumi un control riba e maneho financiero di e Gobierno di turno, pero te awor sin exito. Si e yega di sosode pa cualke motibo, e lo ta un penetracion den e autonomia di nos isla cu ta suficientemente capaz pa maneha su propio departamentonan, incluso esun financiero y presupuestario.

            Ministro Plasterk en todo caso a laga Gobernador Refunjol para su so den e crisis, ora cu el a declara enfaticamente cu Hulanda no a dune instruccion pa nenga di firma e presupuesto. Awor Hulanda y Aruba mester fria cabez pa sali di un impase obstaculizador y enemigo di e relacionnan excelente cu ta existi entre e dos paisnan miembro di e mesun Reino.

            E crisis no a ser permiti pa rebenta y causa dañonan ireparable. Den esey, mi ta ripiti, mester reconoce e intervencion sabio di nos Prome Ministro, kende a asumi un postura defensivo di su isla sin irita o molostia e contraparte.

- Advertisement -

DUNA COMENTARIO

Please enter your comment!
Please enter your name here