Home Politica Gobernador a duna conseho mas di 10 dia pasa con pa sali...

Gobernador a duna conseho mas di 10 dia pasa con pa sali di crisis, pero Mike Eman a hala e conseho un banda

1
0
SHARE
- Advertisement -

ORANJESTAD (AAN):  Lider di MEP Evelyn Wever-Croes den prensa a bolbe enfatisa riba e manipulacionnan di Mike Eman. El’a referi na un carta di Gobernador den cual Gobernador ta mustra Gobierno con nan por sali di e problemanan mas urgente pa por fia placa.

Tur hende sa cu nos pais ta na borde di bancarota causa pa e mal maneho di Mike Eman. No tin placa mas den nos pais, y Gobierno tin problema pa paga gastonan di diesel y gasolin pa e autonan di gobierno. Gobierno no ta pagando APFA locual cu e ta retene di ambtenaarnan.

Gobierno no ta pagando e huurnan di edificio na SOGA.

Pa colmo no ta pagando AZV tampoco manera mester ta.

Y e placa cu mester a bai na e fondo di turismo tampoco a wordo paga, cu a causa cu Minister di turismo Otmar Oduber a menasa Juan David Yrausquin cu hib’e corte.

Y durante e crisis aki, Gobierno no por fia placa pasobra Gobernador no a firma e presupuesto. Mike Eman, Baba Herde, Juan David Yrausquin y mas politico di AVP tur a cuminsa un campaña baho pa desacredita Gobernador. Awor ta sali na cla cu Gobernador ya desde mas di 10 dia pasa a mustra gobierno ki caminda pa cana pa atende cu e urgencianan di nos pais. Pero Mike Eman a hala e conseho ey un banda y a dicidi cu e no ta worry cun’e. E siman aki nan a saca e carta ey y kier hasi manera cos cu ta awo Gobernador a core manda e carta ey, djis pa sigi desacredita Gobernador.

Ta resulta cu e carta ta manda mas di 10 dia pasa, y Mike Eman sosteni pa prensa cumpra di gobierno ta insisti riba e campaña pa desacredita Gobernador.

Lider di MEP Evelyn Wever-Croes a bisa enfaticamente cu e simple hecho cu Mike Eman no a hasi caso di e carta, pero a sigui busca confrontacion cu Hulanda ta condenable, casi criminal.

“Ki dia MIke Eman ta bira honesto cu nos pueblo, ki dia Mike Eman ta bin splica pueblo kico el a hasi cu nos pais? Tanten cu e no ta honesto, tanten cu e no asumi su responsabilidad ni culpabilidad, e no por saca nos pais di e crisis aki tampoco”, lider di MEP a finalisa bisando.

 

- Advertisement -

DUNA COMENTARIO

Please enter your comment!
Please enter your name here