Home Politica Gobernador Rejunjol cu mancha scur riba su cabez

Gobernador Rejunjol cu mancha scur riba su cabez

7
0
SHARE
- Advertisement -

ORANJETSAD (AAN): Segun observadornan, mirando e desaroyo di e ultimo dianan nos no por conclui nada otro cu gobernador Fredis Refunjol ta bay den historia como e gobernador cu ta bay laga un mancha scur riba nos pais Aruba.

Fredis Refunjol como gobernador ta actúa como órgano di país Aruba y como esaki su deber ta pa firma leynan cu ta worde aproba door di parlamento di Aruba cu ta e organo mas halto di nos pais. Esaki no ta nada nobo. Esaki tambe ta e caso pa e ley mas importante di nos pais cu ta e prosupuesto di pais Aruba. Manera tur aña gobernador ta involvi den henter e proceso di e ley aki te na ora cu esaki worde aproba door di parlamento. Despues di esaki gobernador su único tarea ta firma y publica esaki como ley oficial. Sinembargo e aña aki gobernador a dicidi riba su mes pa bay wanta e ley aki y no bay firme te cu e dia di awe, violando nos constitucion y statuto di reino. E posicion aki inconstitucional a trece problemanan grave pa pais Aruba y a crea espacio pa Gobierno Hulandes chantagia y kere cu nan por mete directamente den nos autonomia.

Segun observadornan, esaki a trece hopi disgusto y indignacion den pueplo y nan no por compronde con un gobernador arubiano ta laga su pais cai di e manera aki.

Sinembargo ta bon pa splica pueblo pa kico esaki ta anticonstitucional y contra ley pa cual fredis Refuniol a huramenta di ta leal na dje y na ningun poder aheno, mucho menos di ambtenaarnan hulandes na su despacho y na Den Haag. Aki preguntanan cu nos por a compila for di Pueblo.

Pregunta. Ta kico ta origen di e conflicto cu Hulanda riba presupuesto di pais Aruba ?

Contesta. E origen di e conflicto ta cu aparentemente algun siman pasa gobierno Hulandes – en todo caso promer ministro Hulandes Rutte y ministro Plasterk – a dicidi cu gobierno Hulandes di awor en adelante lo mester por dicidi riba presupuesto di pais Aruba, y no parlamento y gobierno di Aruba.

Pues nan kier pa den futuro ta Hulanda ta esun cu  por dicidi riba nos impuestonan y medidanan pa genera fondo pa pais Aruba y con por haci uso di tur e fondonan cu pais Aruba ta genera.

P: Esaki por segun Statuut ? Statuut ta duna Hulanda e derecho aki pa por controla parlamento y gobierno di Aruba y dicidi riba presupuesto di pais Aruba.?

C: Sigur cu no. Aki ta trata di algo completamente inconstitucional. Absolutamente contra Statuut.

Mester remarca cu Statuut ta e base di tur relacion estatal den Reino. Statuut ta e ley constitucional supremo den Reino, un ley constitucional cu a worde aproba solemnemente pa tur pais cu ta forma parti den Reino. Statuut solamente por worde cambia cu aprobacion di parlamento di tur pais cu ta forma parti di Reino. Pues tambe solamente cu aprobacion di Staten di Aruba.

Statuut ta prohibi tur pais pa mete cu asunto interno (landsaangelegenheden) di otro pais. Statuut ta prohibi Hulanda tambe pa haci esey. Segun tur estudionan cientifico – y por menciona e studio especifico di prof. Van Rijn, presupuesto di un pais den reino a algo autonomo, un ‘landsaangelegenheid’. Metemente di gobierno di Hulanda den esaki ta completamente inconstitucional.

P: Con Hulanda kier logra anto pa haya control riba parlamento y gobierno di Aruba y tur fondo di pais Aruba.

C: Hulanda cu colaboracion di Gobernador di Aruba a dicidi pa no laga e ley di presupuesto di pais Aruba pa aña 2014 cu a worde aproba den Parlamento drenta den vigor te ora cu Aruba accepta cu Hulanda haya e derecho pa den futuro dicidi riba presupuesto di pais Aruba.

Cu esaki pues Hulanda consequentemente a pone beslag riba tur fondo di pais Aruba y a haci imposibel pa Aruba haya e fondonan necesario pa cumpli cu su obligacionnan financiero. Mester apunta aki cu den presupuesto di Aruba pa aña 2014 ta trata di solamente placa di pueblo di Aruba, den presupuesto di Aruba no tin ningun un cent di Hulanda meti.

P: Con por ta possible anto cu Hulanda por stroba ley di presupuesto di pais Aruba pa aña 2014 drenta na vigor ?

C: Esaki ta possible pasobra Gobernador mester firma tur ley di pais Aruba.

P: Gobernador no tin e obligacion anto pa firma un ley aproba den Parlamento di Aruba manera e ley di presupuesto ?

C: Sigur cu si. Den nos systema democratico – den nos Status Aparte – ta parlamento di Aruba ta e organo maximo.

Gobernador ta obliga pa firma tur ley cu pasa den parlemento di Aruba y cu ta di acuerdo cu Statuut y otro leynan constitucional.

Y no tin ningun duda cu e ley di presupuesto 2014 cu parlamento di Aruba a aproba ta di acuerdo cu tur locual Statuut y tur nos otro leynan constitucional ta stipula. Ariba e hecho cu  Gobernador tin e deber di firma e ley di 2014 no tin ningun duda. Un gobernador cu ta ninga di firma un ley cu parlamento di Aruba a acorda y cu ta cuadra cu loke Statuut y otro leynan constitucional ta stipula ta actua inconstitucional. Tur estudio estatal ta demonstra esaki. Por munstra atrobe riba e estudio especifico di Prof. Van Rijn.

P: Kico Parlamento di Aruba a haci pa pone un fin na e actuacion inconstitucional di Gobernador ?

C: Parlamento entre otro a accepta un mocion den cual Parlamento ta declara enfaticamente cu Gobernador di Aruba ta actua inconstitucional door di no firma un ley cu a worde aproba den parlamento di Aruba. Parlamento ta urgi Gobernador pa stop di immediato cu e actuacion ilegal aki cu segun Parlamento ta causa daño hopi grave na pais Aruba.

Y Parlamento di Aruba a pone tur organo den Reino na haltura di e punto di bista cla aki di Parlamento di Aruba.

P: Kico Gobierno di Aruba ta haci pa forsa cumplimento di exigencia di Parlamento di Aruba pa – di acuerdo cu Statuut y nos Constitucion di Aruba, keda e organo maximo pa loke ta toca leynan riba tereno autonomo di pais Aruba, manera e ley di presupuesto,y pa exigi cu Gobernador tambe tene su mes na Statuut y Constitucion di pais Aruba y stop di actua inconstitucioal.

C: Gobierno di Aruba ta completamente di acuerdo cu e posision asumi door di Parlamento di Aruba. Gobierno di Aruba ta haya mescos cu Parlamento di Aruba cu e derecho di  pais Aruba pa por dispone riba su mes un presupuesto ta e esencia di nos Status Aparte manera ancra den Constitucion di pais Aruba.

Gobierno di Aruba ta remarca den esaki cu na momento di asumi nan encargo tur parlamentario ta hura di ta fiel na Statuut y ta hura tambe cu nan lo haci tur loke ta necesario pa conserva Constitucion di pais Aruba.

Gobierno di Aruba lo pone tur instancia den Reino na haltura di e hecho cu Gobierno ta subraya e punto di bista di Parlamento di Aruba manera formula den e mocion cu a worde accepta den reunion di Parlamento di Aruba di dia 11 di juli 2014.

P: Kico lo ta e consequencia si Gobernador no cumpli cu su debernan constitucional y no respeta e mocion cu a worde accepta den Parlamento di Aruba.

C: Gobierno di Aruba ta asumi cu entre tanto Gobernador a relexiona debidamente riba su actitud inconstitucional y reflexiona tambe riba su huramentacion dia cu el a asumi su encargo halto aki. Di acuerdo cu articulo 2 di Reglamento di Gobernador di Aruba, nos Gobernador a hura entre otro di ta fiel na Statuut y cu e lo haci tur so possible pa promove bienestar di Aruba y cu lo tene su mes – y laga otro tene nan mes – continuamente na Constitucion di Aruba y e Reglamento orden di Gobernador di Aruba. Tambe el a hura solemnemente di lo comporta su mes den tur instancia manera ta rekeri di un bon gobernador di Aruba.

Gobierno di Aruba ta lamenta profundamente di – si encaso Gobernador continua cu su actitud inconstitucional manera claramente formula den e mocion di dia 11 di juli 2014 door di Parlamento di Aruba –lo haya su mes forsa pa entrega un denuncia na ministerio publico.

Articulo 25 di Reglamento di Gobernador ta cualifica actuacion inconstitucional di gobernador como un acto castigabel.

P: Kico lo pasa awor si Hulanda bin cu un KB pa kita poder di parlamento y gobierno di Aruba si Aruba nan no cumpli cu e deseo di Hulanda pa entrega e control riba tur e fondonan di pais Aruba na Hulanda..

C: Conseho di ministronan di Reino, cu ta esun cu ta dicidi riba cualkier KB tambe tambe ta mara na tur stipulacion di Statuut y otro leynan constitucional den reino. Tur KB cu ta en pugna di Statuut ta algo inconstitucional.

P: Kico un pais den reino mester haci ora cu e worde confronta cu un KB of un otro decision inconstitucional.

C: Segun articulo 48 di Statuut tur pais den reino, incluyendo Parlamento y Gobierno di Aruba mester tene nan mes estrictamente na stipulacionan di Statuut. E articulo aki pues ta prohibi tur pais den Reino pa ehecuta cualkier decision of ley cu ta en pugna cu Statuut. Gobierno di Aruba lo munstra tur departamento gubernamental di pais Aruba riba e prohibicion aki.

Tambe gobierno di Aruba den e dianan siguiente lo acerca tur instancia den reino y tur istancia internacional cu lo por yuda Aruba conserva su posision autonomo den reino Hulandes esta nos Status Aparte.

Gobierno di Aruba kier enfatisa cu e conflicto cu a surgi den ultimo simannan no ta un conflicto politico partidario. Of un conflicto cu Hulanda. Ya na Hulanda tin politico cu a cuminsa sali na defense di Aruba.

Gobierno di Aruba ta di opinion cu aki na Aruba tur politico y tur instancia y miembro di nos comunidad mester haci lo possible pa Aruba por mantene su Status Aparte.

Ta generacionnan a lucha pa nos Status Aparte, pa nos por ta ‘bas den nos mes cas’, y por dicidi riba nos propio presupuesto.

Ta nos deber pa haci tur loke ta necesario pa conserva e herencia grandi aki. Y esaki lo logra sigur si nos uni forsa contra tur violacion di nos Constitucion di Aruba y nos Statuut di Reino Hulandes cu tin como meta pa elimina e Status Aparte di nos isla.

Cu esaki no tin ningun duda cu fredy Refuniol ta bay den historia como e gobernador cu a laga un mancha riba nos pais.

 

 

- Advertisement -

DUNA COMENTARIO

Please enter your comment!
Please enter your name here