Home General Mas warda mas daño ta causando na relacion cu Hulanda y...

Mas warda mas daño ta causando na relacion cu Hulanda y Rey Willem-Alexander

1
0
SHARE
- Advertisement -

ORANJESTAD(AAN): Na momento cu mester sigui e desaroyo rond di  decision di Gobernador Fredis Refunjol pa no firma e presupuesto di 2014 cu Parlamento di Aruba a aproba, tin cu analisa e rol total cu Gobernador, como representante di Rey Willem-Alexander, tin mag di hunga of no. Ta ser mustra bon cla pa tur hende, principalmente na Hulanda, cu e rol di Rey como cabes di Gobierno, ta solamente un rol di figurante como representante di Reinado Hulandes y nada mas ya cu politicamente y publicamente, Su Mahestad no tinresponsabilidad alguno, pero tur esaki ta cay pa e gobernante y politico.

Sinembargo entre otro ta ser mustra na Hulanda cu e rol di Rey como cabes di Gobierno ta como lo siguiente: E Rey ta forma, hunto cu e ministernan, e gobierno. E Rey ta hefe di estado y tin basa riba esaki algun tarea formal. Posicion: For di 1848 ta para den Grondwet cu e Rey ta “onschendbaar” (no por wordo teni responsabel pa actonan/hechonan politico) y cu e ministernan ta responsabel. Esaki kiermen cu e ministernan mester duna cuenta na parlamento tocante e maneho di e gobierno. E ministernan ta ademas politicamente responsabel pa e expresionnan y actonan di e Rey. E position di e Rey ta wordo refleha entre otro cu firmamento di leynan y decretonan cu ta wordo co-firma pa un minister. Na final di e formacion di e gabinete e Rey ta firma e decretonan di nombracion di ministernan y ta huramenta e ministernan.

Banda di esaki e Rey ta presidente di Raad van State y ta duna e Troonrede un biaha pa aña. E Rey ta hefe di estado di Reino Hulandes, cu ta consisti di Hulanda, como tambe e paisnan Aruba, Corsou y Sint Maarten. Pa loke ta trata e posicion di Funcion ta: Banda di e tareanan formal como Hefe di Estado, e Rey ta haci esfuersonan na beneficio di e poblacion di Reino Hulandes. E Rey tin den esaki un funcion di union, representacion y motivacion.

Loke cu ta e Union ta cu e Rey ta esun cu ta crea union entre hendenan y gruponan y ta apoya e trabao di hendenan y organisacionnan cu tin un funcion di crea union den nos comunidad. Den esaki e ta neutral. Asina e ta contribui na stabilidad den e comunidad y na e continuidad y progreso di e pais. E ta duna expresion na e sentimentonan nacional cu ta biba bao di e habitantenan na momentonan di alegria y di tristeza. Pues claramente por ripara cu e rol di Rey y den e caso di Aruba e rol di Gobernador Refunjol no ta  alcanza pa haci loke el la haci siman pasa cu presupuesto di pais Aruba. E decision di Minister Juan David Irausquin ta bisa mucho mas  di henter e situacion crea pa e gobernador.

E rol cu Cas Real tin cu hunga  como cabes di Gobierno, a drenta un era nobo na 2010 ora cu varios partido politico cu representacion den Tweede Kamer kier a mira e rol  politico di La Reina e tempo ey, wordo disminui mas tanto y practicamente cambia su rol totalmente.

Na 2010 a wordo publica lo siguiente di henter e situacion aki: Den e ultimo añanan di reinado di Beatrix e yamada  (atrobe) a lanta pa disminui e rol politico cu e reina tabata hunga y pasa pa un reinado cu un rol puramente ceremonial, manera ta e caso di e modelo Sueco. Den e modelo aki e rey, por ehempel no tin un rol (politico) pa e rey como miembro di gobierno y como “moderador” di formacion di gabinete. Particularmente durante e formacion dificil di Gabinete Rutte I (un coalicion di VVD y CDA cu apoyo parlamentario di PVV) na 2010 e voznan a lanta pa esaki.

Algun ta sospecha reina Beatrix di ta uza su influencia pa preveni un gabinete asina, pasobra e no lo tabata di acuerdo cu PVV di Geert Wilders, cu ta populista y mustra di tabata birando mas popular. Pero e discusion tocante e monarcia a perde forsa na 2010, pasobra partidonan politico no por a yega un acuerdo cu otro. Tur cos ta bira rond di e pregunta si e rey como hefe di estado, kende hunto cu gabinete ta “forma e gobierno”, mester rindi su miembresia den e gobierno.

Pa esaki bira posibel mester haci cambio den e Grondwet. Algo asina ta dura añanan largo y ta exigi dos tercera parti di parlamento. Esaki no t’ey. Sigur no si PvdA ta mustra di ta contra. E social-democratanan tin miedo cu un hefe di estado cu ta funciona los di e gabinete – pa medio di desaroya popularidad bao di comunidad – ta haya un poder mas di lo deseabel, unda cu politiek pa medio di e responsabilidad ministerial no lo tin control mas.

Di tur forma VVD y e partidonan cristian no kier cambia nada.Tambe otro cambio cu a tuma luga ta cu asina mes na 2012 a introduci mas cambio pa loke ta e rol di La Reina como hefe di Gobierno y pa Gobernador di Aruba den esaki. Esaki a keda publica riba e materia aki unda cu na 2012 a haci un paso chikito den direccion pa un reinado ceremonial. Riba iniciativa di D66 na cuminsamento di 2012, e articulo 139e di “reglement van orde” di Tweede Kamer a conoce cambio. Esaki tabatin como consecuencia cu Tweede Kamer por lo pronto ta obliga pa tuma e iniciativa pa formacion di un gabinete. E rey no ta permiti di hunga un rol den esaki mas.

Den e mesun aña, cu e caida inespera di gabinete Rutte I y eleccionnan prematuro como consecuencia, esaki mester a wordo poni den practica caba. E consecuencia ta cu riba dia 5 di november 2012, despues di un formacion hopi rapido organisa pa Tweede Kamer – e prome gabinete, esta gabinete Rutte II (VVD y PvdA) a wordo forma sin participacion di e hefe di estado. Na momento cu analisa e desaroyonan aki ta lanta e pregunta si Gobernador Refunjol no a hinca Rey Willem Alexander, como su representante den un situacion dificil y problematico asumiendo un autoridad cu e no tin, pero solamente Parlamento di Aruba y e Minister concerni.

Ta mas cu claro cu e mester recapacita y firma e ley cu Parlamento a aproba, ya cu mas tanto e warda cu esaki, ta mas daño  e ta causando na  Rey Willem Alexander. Ta importante pa comunidad ta informa y por haya mas informacion riba website di gobierno di Hulanda.

 

- Advertisement -

DUNA COMENTARIO

Please enter your comment!
Please enter your name here