Home General Por poco un avion MD-83 bulando di Miami pa Aruba a pasa...

Por poco un avion MD-83 bulando di Miami pa Aruba a pasa den catastrofe

6
0
SHARE
- Advertisement -

ORANJESTAD (AAN): Un informacion procedente di Miami ta indica cu dos ex-Stewardess pa Falcon Air Express a entabla un caso legal contra e compania di charter cu sede na Miami, debi cu nan a perde nan trabao despues di a raporta situacionnan peligroso cu por a trece na peligro e bida di e pasaheronan y tripulacion durante dos vuelo aña pasa.

Abogadonan di e dos Stewardess aki, esta Roderick Hannah y Pelayo Duran, kier papia cu cualkier pasahero cu tabata abordo di e dos vuelonan problematico aki cu a socede dia 6 di October 2013, como cu nan por suministra mas detaye encuanto e experiencia hororoso.

“Nos ta kere cu esaki ta un caso serio di tuma venganza y cu por a comberti su mes den un desastre aereo grandi cu e morto di como 145 pasahero y tripulacion riba ambos vuelo,” Duran a relata.  “Awor nos kier papia cu e pasaheronan cu a pasa den tur e amargura di e vuelo ey.  Nos temor di mas grandi ta cu Falcon Air tabata simplemente preocupa pa spaar placa y evita di yena formularionan, envez di e seguridad y bida di esnan abordo di e avion, cu por poco a explota of cay den lama.”

Segun e caso legal, Karla Aquino y Leidy Garafolo tabata stewardess abordo di vuelo Falcon #801 for di Miami pa Aruba riba 6 di October 2013.  E empleadonan a bisa cu nan y e otro stewardesnan tabata finalizando di sirbi e pasaheronan y tabata piki sushi, ora cu e porta L2 den e area di cushina di e avion a kraak y habri aproximadamente 12 duim, permitiendo aire pa supla y sona duro den e cabina di pasahero.

Abogadonan a bisa cu ora e cabina a cuminza perde presion, pasaheronan a cuminza sinti dolor fisico y expresa consternacion y preocupacion, puntrando ta kico a socede, Stewardess Aquino a yama su Senior Flight Attendant, Iris Lopez, pa informe di e situacion.  Su contesta, ta cu Lopez a sugeri pa usa napkin normal pa purba di yena y tapa e kraak.  Stewardess Aquino a informa Lopez, cu e kraak ta demasiado grandi pa haci algo asina.  Lopez a informa e stewardess cu tin nada pa preocupa, y pa djis bay sinta den nan asiento, y aparentemente a informa e head pilot, Capitan Erlin Gonzalez di e situacion.  Ningun accion a ser tuma pa sigura e cabina prome cu e avion a baha na Aruba, y e stewardessnan, incluyendo Aquino y Garofalo, a experiencia nan cabez ta draai, mareo, y birando debil, y dolor intenso den orea, debi cu e cabina a decomprimi y perde presion pa via di e kraak den e porta, segun e caso legal.

E keho den Corte ta mustra cu ora e avion a ateriza na Aruba, stewardessnan a protesta contra e peligro di seguridad y riesgo abordo di e avion, y a nenga di sigui bula den e avion te ora cu e problema a worde drecha.  Nan a topa cu Capitan Gonzalez durante almuerzo dia 6 di October, y a splike kico a socede.  Segun Capitan Gonzalez, e pilotonan tabatin problema pa comprimi y trece presion corecto na e avion debi na un waya cu a kima, cu a pone e avion “over-pressurize”, pues su presion tabata te di mas.  Esaki na su turno por a pone cu e fuselahe of e porta a kraak y kibra.  Gonzalez a bisa e Stewardessnan cu ta “bon mes” cu ta e porta a kraak, pasobra si e no a haci esey, ta henter e avion lo a explota debi na over-pressurization, potencialmente matando of seriamente herida e pasaheronan y crew.

E caso legal ta mustra cu Capitan Gonzalez ademas a splica na e stewardessnan cu mientras cu el y su First Officer tabata usando mascara di oxigeno den e cockpit despues cu e porta a kraak y tabata usando nan!  Pero e mascaranan di oxigeno pa e stewardessnan y e pasaheronan abordo, no a activa y sali cay di plafond.  Gonzalez a sigui informa e stewardessnan cu el a nenga di raporta e situacion como un “emergencia”, pasobra e lo mester bay yena demasiado formulario y no kier a spanta e pasaheronan cu Trucknan di Bombero y demas Vehiculonan di Rescate ora nan ateriza na Aruba.

Subsecuentemente dia 6 di October, basa riba e declaracion cu mecaniconan a fix e problema, e stewardessnan a bay di acuerdo pa regresa Miami for di Aruba abordo di e mesun avion, e biaha aki Falcon #802 segun e caso.  Sinembargo riba e vuelo di regreso, e mesun sonido no-natural di biento por a ser scucha, aunke e no tabata mes fuerte cu e prome vuelo, por  a ser scucha den e cabina ta bin for di e porta L2.  Y e pilotonan, sabiendo di e situacion peligroso, y tratando pa reduci e sonido di biento cu ta leak, na forma eratico a bula e avion na diferente altura, causando cu e vuelo a sacudi masha hopi mes, y pone e pasaheronan y stewardessnan sinti nan mes masha malo.  Lopez a splica e pasaheronan cu e lo prepara un rapport di loke a socede, y cu Capitan Gonzalez lo haci mescos, unavez cu nan yega Miami.

Segun e demanda den Corte, dia 7 di October, Aquino y Garofalo a contact in-flight manager Cyndy Nicholson pa discuti nan experiencia di e dia anterior y pa keha verbalmente y por escrito di loke a socede.  Den e reunion aki, Nicholson a informa e dos stewardess cu ni Lopez ni Gonzalez no a entrega nada di rapport di e situacion.

Dia 9 di October, e stewardessnan a worde yama pa un reunion cu gerente di Recurso Humano di Falcon, y nan a ser informa cu nan ta wordo kita di trabao.  E motibo pa e terminacion ta cu supuestamente nan no a cumpli cu orden di Capitan y Senior Flight Attendant abordo di e vuelonan.  Aquino a wordo acusa di e drumi abordo di e avion, segun a ser bisa.

Abogadonan a bisa cu e dos stewardess ta buscando pa haya back pay y tur beneficio perdi, posible pago si acaso no por pone nan bek na nan puesto, y daño compensatorio pa malestar emocional, humiliacion, y perdida di dignidad, y e gastonan di abogado.

Pasaheronan na Aruba cu tabata abordo di e vuelonan pesimo ey unda casi nan a perde tino debi na falta di oxigeno, y dolor di orea y mucho mas, ta ser pidi pa contact e abogado Pelayo Duran na Miami na 001-305-299-9258.

 

- Advertisement -

DUNA COMENTARIO

Please enter your comment!
Please enter your name here