Lider MEP Evelyn Wever- Croes
ORANJESTAD (AAN): Den e conferencia di prensa di diaranson ultimo lider di MEP a elabora riba enseñansa poniendo enfasis entre otro riba e comienso di aña escolar y e problemanan cu a acompaña cune. Sra. Wever-Croes a declara lo siguiente: mi a hasi varios bishita pa wak con e aña escolar a inicia. Apesar di e hecho cu hopi turbulencia y desavio a bini padilanti pero e actictud y compromiso di parti cabesantenan y docentenan di scol pa cu solucion a lagami hopi trankil.
Lider di MEP a pone enfasis riba scol di Juliana na Hato y a declara “mi kier para keto na un scol cu a cuminsa cu un atraso serio y esaki ta Juliana school na Hato. Pasobra hustamente Juliana School ta e scol cu a bira victima di un promesa kibra pa tin un scol mavo/havo na Noord, pasobra nan tabata wardando e mavo/havo na Noord keda cla pa muda eyden. Pesey no a atende cu e necesidadnan di e scol pa amplia cantidad di local.
Ma tende for di varios oponente cu nunca tabatin un plan di MEP pa un scol nobo na noord. Esaki ta algo cumi ta nenga categoricamente y por prueba esaki. Pa cuminsa tin un documento cu jama “beleidsadvies bouw avo scholen traha for di december 2007”. Tambe tin cartanan di minister di finansas dirigi na sra Anke Bijleveld, secretario di estado di Hulanda pa cu e financiamento di proyecto aki. Tambe tin un projectdossier traha door di Price Waterhouse Coopers cual tabata un rapport hopi impresionante. Ademas tin tambe mapa y proyecto di parti HJC consult.
Finalmente nos tin tambe carta di aprobacion di parti sra Anke Bijleveld unda e proyecto aki a haya un seyo di aprobacion den nomber di gobierno di Reino unda cu por usa e placa di FDA pa e proyecto di scol. Akinan bo por mira cu tur cos tabata cla pa e proyecto aki bou gobierno di MEP. Sinembargo na 2009 Aruba a conoce un gobierno nobo cu no a wak enseñansa como prioridad! Pasobra e fondonan destina pa e scol a wordo usa pa un proyecto fracasa di tram! Gabinete Mike Eman a priminti varios biaha di pone e prome piedra, pero te dia di awe esey ta otro promesa kibra. Pa ilustra e contraste den e prioridadnan, pasobra mientras no a pone ningun piedra pa e scol, ya caba a bestel e di dos y e di tres tram caba.
Den vision di partido MEP enseñansa mester haya prioridad, y scol mavo/havo na Noord tin cu haya prioridad hopi halto.
