ORANJESTAD (AAN): Manera ta conoci na comienso di e milenio aki Nacion Uni a declara aña 2005 pa 2015 como decada di educacion pa desaroyo sostenibel. Den cuadro di esaki Instituto Pedagogico Arubano (IPA) a cuminsa cu un proyecto piloto tocante desaroyo sostenibel aña pasa den e materia Perspectiva Mundial.
Durante e lesnan aki a introduci e concepto di desaroyo sostenibel pa e studiantenan di aña tres di IPA. A operacionalisa e concepto di desaroyo sostenibel di IPA for di definicion di Brundland cu a keda acepta den decada nobenta pa Nacion Uni.
Nacion Uni a defini desaroyo sostenibel como un desaroyo cu ta tene cuenta cu un balansa entre e aspecto social, economico y medioambienal pa por cumpli cu e deseonan di e generacion actual, sin stroba e deseonan di nos futuro generacionnan. IPA a operacionalisa esaki pa haci e traduccion facil pa enseñansa den 4 Pnan; 4 dimension cu ta “Planet, People, Profit y Participatory Governance”. E componentenan aki ta exigi un moda di pensa multidimencional y holestico.
Durante e proyecto piloto den e programa Perspectiva Mundial, e studiantenan di aña tres a siña con pa pratica e 4 dimensionnan den nan lesnan. Den practica ta busca solucion pa e problemanan actual den nos comunidad a base di un balansa di e 4 dimensionnan aki. Esaki nos ta yama educacion sostenibel. E metodo aki ta uno cu ta pone e mucha pensa un otro manera di modo cu lo yuda nos futuro generacionnan.
Mirando tur e problemanan actual den nos mundo manera crisis financiero, crisis social, guera, e conflictonan tur caminda, IPA ta convenci cu nos mundo ya no ta bay mas den un direccion sostenibel. Nos mester cambia e desaroyo basa riba un pensamento di desaroyo inclusivo sostenibel. Pues nos mester siña nos muchanan kico ta husto y solidario pa su prohimo sin exclui ningun hende pues personanan menos capacita of otro raza. Basa riba esaki IPA kier traha di manera mas sostenibel tanto, den su operacion como den su curiculo. E aña academico aki IPA lo cambia e contenido pa studiantenan di aña uno pa e materia Hende y Comunidad, cu lo dirigi su mes riba desaroyo inclusivo sostenibel. IPA a presenta un plan encuanto cambio di structura y operacion pa Minister di Enseñansa pa uno sostenibel. Durante aña benidero lo duna mas informacion tocante esaki. Vision di IPA ta hopi cla. Nos lo kier bira e prome Instituto Pedagogico sostenibel cu cooperacion di nos minister.
