ORANJESTAD (AAN): Diabierna ultimo, durante e di tres edicion di “Women in Leadership” a toca e honor na representantenan di CMB pa entrega un Leon di Oro na Señora Yvonne Spellen.
Esaki ta solamente di dos biaha den historia di e premio aki cu e ta worde entrega na un persona pafor CMB. E unico biaha anterior esaki a bay pa Sr. Padu Lampe, Tata di nos Cultura.
Señora Spellen ta bon conoci pa su trabao incansabel como defensor y protector di hendenan muhe den nos comunidad. Pa medio di su funcion den Fundacion pa Hende Muhe den Dificultad, hopi bida a worde salba y cambia. Esaki ta un trabao y un logro cu CMB ta sinti cu merece su reconocemento di e forma aki. Practicamente henter su bida Señora Yvonne a dedica na mehora situacionnan social den nos comunidad y pa e ultimo 20 aña a dedica specialmente na hende muhe cu tin problemanan especialmente violencia domenstico.
E Leon di Oro a worde entrega door di Armin Solognier di Caribbean Mercantile Bank N.V., kende di biaha anuncia cu e donacion original di 10,000.00 Florin lo worde redobla pa 20,000.00 Florin, especialmente den celebracion di Señora Spellen su cumpleaños cu pa casualidad tabata e diabierna ey tambe.
E banco tabatin regalonan special y personal pa Señora Yvonne pa su cumpleaños y ta dese’e hopi mas aña di bida.
Ariba e potret por mira di robes pa drechi por mira Armin Solognier, Ghislaine Grant (CMB), Yvonne Spellen, Nizana Solognier (CMB) y Ilán Lopez (CMB).
