Home Editorial Editorial: HOPI ACUSACION RECIENTE Y INHUSTO CONTRA MIKE EMAN

Editorial: HOPI ACUSACION RECIENTE Y INHUSTO CONTRA MIKE EMAN

3
0
SHARE
- Advertisement -

                       Ta berdad cu e ta e responsable cu awa no ta yobe? Cu Aruba ta baña casi tur dia den un calor insoportable? Cu e ta responsable cu Gobernador no kier firma e presupuesto? Cu Hulanda a medio bira lomba pe? Cu oposicion a sintie fortaleci na momento cu Hulanda ta menazando interveni na Aruba y asina atenta contra nos autonomia? Un tou di suposicion, di speculacion, di ridiculeznan sin precedente, y di intentonan di abusa di e afan di credulidad grandi cu tin nos Pueblo casi completamente domina. E ta practicamente den e capacidad actual di kere den cualke cos, di cay pa cualke speculacion con tal cu e ta respalda pa un par di cifra o estadistica, aunke  absurdo. E no por sigui rindi homenahe na cualke profeta cu surgi di e camponan pobla di populista.

            Si nos studia nos isla bon, y nos nota e rumbo cu nos Pueblo a tuma, nos mester por compronde cu e no ta e resultado di  un inferioridad di cultura cu ta determina e nivel di nos custumbranan, sino cu nos ta pega den un periodo turbulento di nos desaroyo, cu si nos no pone bon tino na dje y cambia oportunamente loke nos por, e ta bay hiba nos den un franco regresion pa e desaparicion di varios di nos virtudnan civico.

Un bon parti di nos leynan constitutivo, si nos kier admitie of no, ta consagra e mentira di libertadnan  y podernan ilusorio, y e gobiernonan di turno ta fatalmente represivo contra nan oposicionnan, o fatalmente debil, atrapa entre legislacion y tradicion, pasoba nan ta yama nan mes propagadornan di derecho, pero derechonan cu a surgi di algun forza eherci pa un dictador di casta o di turba dirigente.

            En realidad nos no a bira cara contra progreso, nos a bira cara den direccion di e colonia for di unda nos a sali y ta bayendo directamente pa un coloniahe nobo. Nos gobiernonan no ta forma un parti real di nos sociedad pasobra nan ta biba pafo di dje, segun un set di reglanan presupuestario. O sea cu nan ta biba di nos presupuestonan y e resto di nos ta biba di nos labornan. Cierto of no?

            Odio a ciega e interes den e grandeza posible di Aruba. Pa probecha di e tremendo falta di su contrarionan, y di disputarle gayardamente su opinion e conservatismo a aparece bao e rebeldia cu kier haci un lucha husto, pero solamente pa na final cobra tur su deshonranan den e sudor di su rumannan. No tin nada cu e no a somete su mes gustosamente na dje pa motibo di su odio contra su adversarionan. Idem pa oposicion, cu no a tuma un rumbo diferente pero ta canando riba e mesun linea ekiboca ey.

            Na Aruba a goberna cerebronan grandi o politiconan di altura, manera Henny Eman, cu a produci deslumbramento y transformacionnan milagroso den un tempo considera ainda atrasa; un Juancho Yrausquin cu a vislumbra loke awe ta e pilar di nos economia, un Betico Croes cu a demostra un caracter di firmeza y un cerebro privilegia pa logra pa Aruba loke mas Pueblo tabata desea.

Falta awor e estadista cu tin e entusiasmo pa impone Leynan den momentonan di crisis decisivo, un escritor y  politico alavez cu por emula e excesonan cerebral di Juancho, y e caracter di firmeza di Betico. Y mi ta pensando den un solo politico cu por acopla tur e virtudnan ey den su caracter, y e  no ta ningun otro cu Mike Eman, dia cu e dicidi di bira politico y pone santidad un banda; dia cu e por tuma decisionnan sin importe criticanan contrario. y resolve e crisisnan cu tin Aruba hoga. E mester pone un banda su actonan temerario, su temor di critica, su afan di modelahe, y mustra nos e berdadero banda di su gran cerebro y su firmeza di caracter. Ta e so por duna nos e estadista cu nos ta anhela pa elimina e lista  monotono y sombrio di otronan cu ta pretende di por ocupa e posicion honorable ey, pero ta demasiado yen di un fayo of otro pa por logre.

 

- Advertisement -

DUNA COMENTARIO

Please enter your comment!
Please enter your name here