Home Editorial Editorial: NO TIN SUBSTITUTO PA DIALOGO!

Editorial: NO TIN SUBSTITUTO PA DIALOGO!

1
0
SHARE
- Advertisement -

          Ta hopi notable con e manifestacionnan teni te awor dilanti di e oficinanan di Gobierno a bin ta deteriora, yegando te na confrontacionnan marca pa violencia. Te ainda nos ta na tempo pa coregi e aspecto ey, y ta miho pa nos hacie awor prome cu e bira intratable o coregible. Diferencianan di opinion semper ta bay existi, y e chokenan ideologico o politico entre Gobierno y cualke oposicion tambe, pero mester por yega na un sistema den cual dialogo por substitui violencia permanentemente.

                 No ta cumbini ningun hende ora pasionnan desborda y na lugar di recapacitacion, ta cay den e garanan di enfrentamentonan nada amigable o sostenible cu argumentonan sano. Nos a mira un manifestacion asina poco dia pasa, unda tiramento di obhetonan tabata na ordu di dia, y kimamento di dump a corona tristemente un evento cu mester a cuminza y caba den trankilidad. Cu cualke grupo tin e derecho di protesta riba caya o unda otro cu nan kier no ta ni sikiera discutible, pasobra e ta un derecho hancra den nos Constitucion.   Pero, esey no ta duna ningun hende e libertad pa abusa di e derecho ey tampoco!

                        Mañan cu e oposicion actual asumi poder, ta bon pa nan corda cu nan tin di bay somete nan mes na e mesun violencia cu nan a introduci den e ultimo manifestacion. Laga nan no pensa mes, ni pa un seconde, cu e relacionnan ta bay cambia pasobra nan a drenta Gobierno! E ‘modus operandis’ cu nan a introduci den e manifestacion reciente ta bay impone su mes cu facilidad den man di otronan cu di Gobierno lo pasa pa oposicion. Lanta Pueblo pa e protesta contra loke e por considera un mal maneho publico, no ta mescos cu lante pa un confrontacion violento cu por na algun momento resulta den un tragedia pa nos isla. Ningun hende sensato por tin un idea o plan asina den su cabez, pasobra e ta contra tur forma logico di pensa. Pone presion a base di violencia pa invoca cambionan desea no ta mescos cu exigi e cambionan ey cu un presion politico (no violento) cu por logra e mesun resultado, pero sin laga atras dañonan ireparable.

              Ta logico cu tin un disgusto grandi den hopi hende na Aruba contra tur e medidanan tuma te awor, y otronan cu lo drenta den vigor na algun momento den e futuro inmediato. Mester, pesey mes, crea un sistema di dialogo entre Gobierno y oposicion cu ta permiti discusionnan franco y al caso ora cu tur otro avenida ta cera y un di e dos partinan ta haya su mes lomba contra muraya. Desesperacion no ta un bon consehero den un caso asina, y tampoco un confrontacion violento, pero si por logra crea un manera di topa otro sin condicionnan previo pa discuti cosnan cu ta afecta casi henter Pueblo, ta imperativo hacie pa e bon di nos isla. Ningun hende tin algo di gana cu confrontacionnan violento cu por pusha nos riba un caminda sin retorno. Tur dos parti, Gobierno y oposicion tin hendenan cu cerebro suficiente pa construi un sistema cu ta permiti ambos parti enfrenta otro sin boter o piedra den man. Mi ta nenga di kere cu riba nos isla  no tin esnan cu cabez frio cu por hacie.

         Obtene un cambio rapido fundamental den nos custumbranan publico y politico ta hopi dificil, pero no imposible. Buske sin descanso ta nos deber como ciudadanonan cu ta stima nos isla y ta desea solamente loke ta bon pe.

- Advertisement -

DUNA COMENTARIO

Please enter your comment!
Please enter your name here