Home General Prome Minister Mike Eman a duna un tremendo discurso na Nacionnan Uni

Prome Minister Mike Eman a duna un tremendo discurso na Nacionnan Uni

1
0
SHARE
- Advertisement -

ORANJESTAD    (AAN): Diahuebs ultimo, Prome Minister di Aruba, Mike Eman tabata parti di un panel prestigioso hunto cu Secretario General di Nacionnan Uni, Ban Ki-Moon, Helen Clark di UN Development Group y Enviado Special pa Paz y Reconciliacion Forest Whitaker entre otro. E evento a tuma luga den e ‘Trustee Council Chamber’ na sede principal di Unionnan Uni na New York.

   E tema di e anochi tabata, “Moving to Implementation: Findings from the UNDG Dialogues on Post-2015 Implementation.” E enfoke di e anochi tabata  con pa implementa meta y prioridadnan articula den un serie di ‘dialogonan’ patrocina pa Nacionnan Uni caminda mas di 50 pais rond di mundo a participa. E dialogonan aki ta dedica na esfuersonan pa por yega na pueblonan cu normalmente no ta wordo consulta den e proceso internacional.

    Te awo, mas o menos 5 miyon hende a expresa nan prioridadnan den loke Nacionnan Uni ta yama, “The World we Want.” E Prome Minister di Aruba a papia cu hopi pasion di con Aruba a bin ta trahando riba su meta di yega na un desaroyo sostenibel. El a bisa, “Tempo cu nos a drenta gobierno na 2009, nos a haci un analisis di con leu nos pais a yega den e ultimo 25 añanan: den populacion, den e exito di nos industria turistico y con nos standard di bida a crece y nos GDP per capita. Aruba a crece di 200.000 bishitante pa aña, te na casi 1.5 miyon y cambernan di hotel a aumenta for di 2000 te na 8000.” Prome Minister Mike Eman a splica cu tur e crecemento y exito economico aki a pasa den un pais masha chikito cu un densidad di poblacion di 500 hende pa kilometer cuadra, loke ta uno hopi halto.

    “El a bira tempo pa nos, como pais, cuminsa reevalua na unda nos kier bay den e siguiente 25 añanan. E tabata hopi cla pa nos cu nos mester enfoca mucho mas riba calidad y no cantidad, expandiendo nos economia sin haci e demanda riba infrastructura y recursonan natural mucho pisa, y poniendo atencion special na promove miho cohesion social.”

    El a resumi e metanan di Aruba bisando, “Si, Aruba ta orguyoso di su hotelnan di 5 strea, pero nos kier scolnan tambe di 5 strea, hospital y cas pa ancianonan di 5 strea.” El a pone hopi cla cu prosperidad y exito material sacrificando calidad di bida di ciudadanonan no ta un fundeshi pa un bon sociedad. Recuperacion economico ta vital. Protege empleo di ciudadanonan y crea trabou nobo, ta absolutamente esencial. Pero el a enfatisa, “Nos ta den temponan cu tin un necesidad urgente pa renobacion di sentido prosperidad comparti den un mundo cu recurso finito, pero nos mester papia den termino di balornan comparti, no balor pa e ‘shareholder’. Nos mester realisa cu un standard di bida mas halto no ta igual na calidad di bida mas halto. Nos mester tuma accion pa sigura cu nos ganashinan material mester traduci den un miho calidad di bida, mas felicidad pa nos ciudadanonan y den e cohesion social di nos comunidadnan.”

    Na final di discurso di Prome Minister di Aruba, e moderador Nacionnan Uni, a bisa cu e tabata asina impresiona cu e expresionnan elocuente di Prome Minister Eman cu el a ‘Tweet’ e expresionnan, “We [Aruba] cannot only have 5-star hotels, we also want 5 star schools, hospitals…” y “shared values, not shareholder values…”

- Advertisement -

DUNA COMENTARIO

Please enter your comment!
Please enter your name here