Home Editorial EDITORIAL: DROGA, LABAMENTO DI PLACA Y HENDRIK CROES (2) (Ocando…y mas)

EDITORIAL: DROGA, LABAMENTO DI PLACA Y HENDRIK CROES (2) (Ocando…y mas)

9
0
SHARE
- Advertisement -

 
          E nomber di Ocando Paz ta bon conoci na Aruba, ya cu su relacionnan cu Hendrik Croes, como su abogado (y socio?), a permitie haci su negoshinan via nos isla. E tabata bin cu su avionetanan priva, den cual e tabata trece droga den e parti patras, djey e tabata sali rumbo pa Miami y Fort Lauderdale, unda e droga tabata ser bendi. DEA tabata completamente na altura di su movimentonan, y den nan archivonan nan tin henter e historial di e narcotraficante ey y su aliadonan. Despues di bende e droga nan tabata recoge e placa y e tabata bin cune Aruba, unda nan tabata hiba e maletanan hotel Concorde, unda Ocando tabata tin un suite (721) reserva henter aña. Ey nan tabata conte cu e ayudo di algun croupier despues di nan trabao. Ey tambe e tabata  hunga hopi placa den casino cu Hendrik sinta banda di dje!

            Awe mi ta publica algun nota relaciona cune, pa hende mira ta te ki extremo Hendrik tabata dispuesto di yega pa calma su hamber insaciable pa placa. No tabata importe di unda o con e tabata bin, con tal cu e tabata caba parcialmente den su saco. Ocando Paz a trafica mas di 5 mil kilo di cocaina via Aruba, cu tabata e punto intermedio di su vuelonan pa e parti sur di Merca, y e centro di su operacionnan clandestino. E tabata un piloto di e Forzanan Aereo Venezolano, cu lazonan di Amistad y comercial cu algun politico ayega na e Gobierno di MEP di e tempo ey. Hendrik tabata e Ministro di Justicia!

            Autoridadnan Venezolano a detene Ocando na Caracas, despues cu nan a descubri 132 kilo di cocaina den e interior di su avioneta YV-53-50 staciona na e aeropuerto internacional di Maiquetia. El a ser condena na un cantidad di aña di prison, unda otronan a mate y a procede pa saca su curazon y bente bao di e cama unda e tabata drumi morto caba.

            Nan modus operandis tabata cu Hendrik mes o cualke persona cu e tabata designa tabata topa Ocando na aeropuerto, nan tabata yude saca e maletanan yen di e placa sushi via e V.I.P. room di aeropuerto, sin pasa pa e control di aduana, y djey hiba hotel Concorde pa e ser conta y despues hiba banco pa e ser laba. E negoshi ey tabata asina descara pasobra e tabata conta cu e proteccion di e autoridadnan politico den e Gobierno di e tempo ey. Cosnan a yega asina leu cu te hasta Betico a yega di viaha den un di su avionetanan. Claro cu Betico tabata inocente di tur loke tabata relaciona cu “nan” negoshi sushi, te dia cu Benny Nisbett a confronte cu e berdad den Parlamento. Nunca mas Betico tabata kier sa algo di e elemento ey, ni di su relacionnan cu Hendrik y consorcionan.

            Awe DIARIO ta publica tambe e cabez di un noticia scandaloso relaciona cu Hendrik, ya cu el a ser acusa den sala di Parlamento pa un ex-Ministro di Justicia pasobra Hendrik a ordena e libertad di un acusado pa droga contra voluntad di e Fiscal. Lo mi bin riba e caso ey den detaye Dialuna awor, pasobra tur dos Fiscal Hulandes, o sea Mr. Hoogland y Mr. Van Wijland a nenga di obedece e orden skirbi na man di Hendrik como Ministro di Justicia pa pone e narcotraficante Sanchez den libertad. Djey el a prohibi nan pa atende casonan di droga te cu Mr. Van Wijland a lanta un caso contra dje y a gane tambe. Ta awor e porkerianan di Hendrik ta bay cuminza sali! Keda pendeinte.

            Tambe mi ta publica awe un caso importante cu mi a gana contra e Consejo di Ministronan di MEP, y loke Huez a determina. No ta perde so DIARIO  a yega di perde algun caso (masha poco den 34 aña di existencia), sino cu nos a gana tambe un gran cantidad di casonan sumamente importante como medio di comunicacion contra e politiconan malvado di e tempo ey. Esaki ta djis un di nan.

 

- Advertisement -

DUNA COMENTARIO

Please enter your comment!
Please enter your name here