Home Editorial Editorial: KICO ARUBA TA GANA CU ACCIONNAN DESTRUCTIVO?

Editorial: KICO ARUBA TA GANA CU ACCIONNAN DESTRUCTIVO?

3
0
SHARE
- Advertisement -

             Na Aruba parce cu ultimamente desesperacion politico ta obligando algun aventurero pone henter e bienestar di e isla na peligro. Ta inconcebible cu di algun manifestacion fracasa, awor kier pasa pa mete cu e pilar economico di Aruba, comosifuera cu si e ser afecta den cualke medida, nos lo por recupere cu facilidad. No, shonnan. boso no tin nada di perde, pero e Pueblo si por ser afecta mas seriamente cu cualke persona por imagina. Mete cu turismo, o haci campaña politico negativo entre e turistasnan cu ta na Aruba, ta parcemi un locura di tamaño mayor.

           Evelyn mester por a compronde cu ta e mes e tin di culpa pa loke a sali publica ultimamente di placanan na granel cu e ta ricibi riba su cuenta bancario. Y pa su informacion, NADA ta falsifica! E unico falsificacion confirma ta uno di un diploma cu un miembro di su partido a yega di comete den pasado. Loke DIARIO a publica ta legitimo, completamente real y condenatorio. Si Evelyn no tin e honestidad suficiente pa reconoce, y awor kier respalda actonan di locura, e no tin e derecho di keda como lider di un partido cu a logra cosnan glorioso pa nos isla den pasado. Ta imposible imagina cu den MEP no a keda ningun activista cu tin e interesnan di Pueblo na pecho, y ta para un banda pa mira den otro direccion mientras un par di inconsciente ta comete actonan antipatriotico djis pa purba logra baha Gobierno.

            Shonnan, Gobierno no ta bay baha bao presion di manifestacionnan cu no ta representa e boluntad di e mayoria di nos Pueblo. Aki dos aña tin eleccion y tur hende tin e privilegio democratico di deposita su voto pa respalda o baha e partido cu ta den Gobierno, dependiendo di e opinion personal cu cada ken tin di dje. Mester warda riba e ocasion ey y probecha di dje pa expresa disgusto o aprecio pa kendenan ta gobernando Aruba actualmente. Pero, pone e stabilidad di nos isla den peligro, y mete cu su pilar economico no ta parcemi un acto politico aceptable o sikiera tolerable. Pa mas frustra cu bo por ta pasobra Gobierno no ta bay na bo kier, e no ta dunabo e derecho di mishi cu e progreso cu Aruba a logra durante tanto aña di esfuerzo y dedicacion.

          Segun mi, ta toca Evelyn purba hinca algun sentido comun den e cabeznan cayente cu kier crea caos y desesperacion riba nos isla, pasobra si nan bay door cu nan metemento cu e pilar economico di Aruba, ta Pueblo ta bay perde loke e tin te awor cu ta dune e confianza di por cria su famianan adecuadamente. Ya tin varios turista ta puntrando kico ta pasando na Aruba, y cu e ta birando un isla cu nan no conoce, cu nan a yega di bishita, pero cu tabata tin un ambiente di paz y trankilidad cu a inspira nan bolbe bin pasa nan vacacionnan aki. Mete cu esey ta igual na destrui e labornan cu varios Gobierno (incluyendo di MEP) a crea hunto pa duna Aruba e fama di un destinacion atractivo. Ban pensa realisticamente: ni tur e gritamento na radio, y tur e badabadanan crea publicamente entorno di publicacionnan legitimo y real, ni tur e campañanan negativo por a trece hunto mas di algun cien persona pa tene manifestacionnan sin pia ni cabez. E derecho pa manifesta tey, pero no esun pa abusa di dje den detrimento di nos isla. Mester actua cu mas cordura, mas inteligencia, menos pasion y mas amor pa Aruba.

- Advertisement -

DUNA COMENTARIO

Please enter your comment!
Please enter your name here