Home General “Maestro di Aña 2014” ta un proyecto di hopi balor

“Maestro di Aña 2014” ta un proyecto di hopi balor

0
0
SHARE
- Advertisement -

Minister Michelle Hooyboer-Winklaar

Henter comunidad  por a aporta y nomina

ORANJESTAD    (AAN): “E proyecto di Maestro di Aña ta un proyecto hopi bunita y sigur uno cu ta stimula nos maestronan di scol, pa sigui cu e tremendo trabou cu nan ta haciendo”, asina Minister Michelle Hooyboer-Winklaar encarga cu maneho di enseñansa riba nos isla a duna di conoce. Hopi biaha nos maestronan ta traha den un ambiente cu hopi reto, ya cu e problemanan social tin semper influencia riba e prestacion y animo di alumnonan.

   E maestro ta un pilar fundamental den e formacion di e alumnonan y e ta e fuente di inspiracion pa su otro coleganan  y tur cu ta traha den e area di enseñanza. P’esey e enfasis riba e premio na unda ta galardona e maestro dor di duna reconocemento na  e trabou di maestro. Un  trabou considera como un di esunnan mas importante di un pais, mirando cu e maestronan, hunto cu mayornan, ta yuda forma nos futuro generacion y e futuro lidernan di nos pais.

   Esaki ta di 4 aña consecutivo cu Departamento di Enseñansa ta habri e nominacion, ta yuda esunnan cu kier nomina cu informacion y na ultimo ta sostene e baluartenan  pa cu e escogencia di Maestro di Aña 2014.

   Henter comunidad por a nomina un maestro/a di enseñansa preparatorio, basico, special, avansa of profesional, dor di enfoca riba tur lo positivo cu ta sosode den klas, scol y comunidad gracia na es cu ta nomina.

   Na aña 2013 a eligi Juffrouw Marisol Croes di Scol Dun’un Man como Maestro di Aña. Juffrouw Marisol a dedica hopi tempo na desaroyo individual y a traha hopi cu motivacion di su alumnonan. Entre e nominadonan pa aña 2013 tabata juffrouw Marisol Croes di Scol Dun’un Man pa Enseñansa Special, juffrouw Charity Croes di Arco Iris Kleuterschool pa Enseñansa Preparatorio, juffrouw Teresita (Sita) da Costa di Maria Regina School pa Enseñansa Basico, juffrouw Mariana Jimenez di Colegio Arubano pa Enseñansa Secundario y juffrouw Sarah Sambo di Colegio EPI pa Enseñansa Post Secundario/Superior.

   Durante e siman di 17 di november lo bira conoci ken e cinco nominadonan di e aña aki ta. Minister Michelle Hooyboer-Winklaar lo bishita cada un di nan personalmente na nan scol.  Y na inicio di december Departamento di Enseñansa lo saca e ganado absoluto di aña 2014 durante un evento special.
   Organisa un proyecto di e tamaño aki ta exigi hopi preparacion, pero ta duna un bunita mensahe  cu ta aprecia, compronde y balora e trabou di nos maestronan. Minister Michelle Hooyboer Winklaar a enfatisa cu “Tipo di proyecto asina ta duna realse na e importancia di esunnan cu ta para dilanti di klas. E ta un muestra di e balor cu ta sinti pa esunnan cu ta educa, guia y protege e futuro di nos mañan, nos muchanan”.

   E mandatario a finalisa bisando cu “Mi ta gradici cada un di e personanan envolvi cu e proyecto aki, pa nan dedicacion y atencion cu nos maestronan. Y mi no por keda sin felicita tur esunnan cu ta bin na remarca pa e nominacion pa nan e pasion y dedicacion cu nan ta pone diariamente den nan trabou.”

- Advertisement -

DUNA COMENTARIO

Please enter your comment!
Please enter your name here