Home General A.T.A. y MasterCard a uni forsa pa mehora y mantene e...

A.T.A. y MasterCard a uni forsa pa mehora y mantene e nivel di servicio na Aruba

5
0
SHARE
- Advertisement -

ORANJESTAD (AAN): Aruba Tourism Authority (A.T.A.), hunto cu MasterCard a colabora pa facilita un seminario pa  unda e servicio cu ta wordo brinda na nos bishitantenan y localnan ta uno di miho calidad. Un di e puntonan fuerte di Aruba semper tabata e servicio amabel cu a hasi cu e turistanan ta bolbe nos isla. E toke personal, e amistad, e “dushi hende” cu ta mustra semper su sonrisa y comprension pa cu e situacion di e otro persona, ademas di ta haci lo posibel pa e experiencia di su cliente ta uno excelente y positivo.

A.T.A. conhuntamente cu MasterCard a identifica e necesidad pa sigui brinda apoyo y promove educacion di servicio den nos industria di turismo y hospitalidad. Asina a cera cabes y a organisa un seminario, cual a wordo ricibi cu entusiasmo.  E siman aki e prome sesion di e “Service Enhancement Program” hunto cu e “Managerial training” a wordo realisa.

E sesion di mainta  a wordo ofreci specialmente pa e graduadonan di e Aruba Certification Program miho conoci como “Mi Compromiso” y e sesion di atardi tabata dirigi pa esunnan den un funcion mas halto den hospitalidad y turismo.

A encurasha e participantenan pa sigui uza e conocemento y tipnan cu nan a ricibi durante e Aruba Certification Program y pa sigui traha riba nan desaroyo personal y aplica tipnan valioso cu ta hisa e calidad di servicio cu Aruba ta brinda pa un nivel mas halto. Durante e sesion di atardi a concentra riba informacion practico, y asina duna e tipnan y tecnica nan cu ta aplicabel den nan funcion diariamente.

A conta cu oradornan local y internacional cu a subraya e importancia di por brinda un bon servicio y con pa duna realse na e servicio cu ta wordo ofreci. Esunnan presente cu a forma parti di a panel, a percura pa por duna informacion, idea y tipnan cu ta facil pa aplica den practica for di Helen Guda di Aruba Learning . 

Ademas e guestspeaker invita pa e seminario, Christina Jones di CJones & Co, a enfoca ariba e crecemento personal di cada persona, e capabilidad y tecnica nan cu cada uno ta pose pa mehora e servicio. Banda di esaki Maas van Drie di Aruba Tourism Authority, Jacky Korn y Andy Gonzalez di MasterCard como tambe Jim Hepple di Aruba Hotel and Tourism Association (AHATA) tawata  oradornan invita cu a duna nan banda pa  asina mehora servicio na Aruba.

Turismo ta e pilar economico mas importante di nos isla y ta cu cooperacion y contribucion di tur hende ta traha diariamente na salvaguardia e stabilidad y crecemento di e industria aki. Aruba a bira famoso pa su servicio excelente, cu ta unico den su estilo; describi pa mayoria persona cu e palabranan entusiasmo y sincero, identifica cu e palabra “Happy”.

Aruba Tourism Authority y MasterCard ta contento di por a ofrece e seminario special e siman aki. A.T.A. ta sigui traha riba instrumentonan y proyectonan pa promove e programa conoci como “Mi Compromiso”, como e compromiso di Aruba Tourism Authority cu tur esunnan laborando y contribuyendo tur dia na e exito di nos turismo.

- Advertisement -

DUNA COMENTARIO

Please enter your comment!
Please enter your name here